ԱՄՆ-ի Կալիֆորնիայի նահանգի Ֆրեզնո քաղաքից մի խումբ բժիշկներ Արցախում շարունակում են անվճար իրականացնել քաղաքացիների ընդունելություն, հետազոտություններ, խորհրդատվություններ և վիրահատություններ:
Բացի մասնագիտական ծառայություններից նրանք «Մոր և մանկան առողջության պահպանման կենտրոն»-ին նվիրաբերել են լապարասկոպիկ և հիստերոսկոպ սարքեր: Գինեկոլոգ Ջեֆ Թոմասն ասել է, որ այս տարի 25 հազար ԱՄՆ դոլարի վիրահատականսարքավորումներ է ուղարկել Արցախ: «Մենք այստեղ ենք փորձով կիսվելու արցախցի մեր գործընկերների հետ: Արդեն իրականացրել ենք 6 վիրահատություն: Նշեմ, որ լապարասկոպիկ այս նոր սարքի միջոցով, հիվանդին քիչ ցավ պատճառելով, վիրահատությունն ավելի հեշտ և արդյունավետ է կատարվում»,-ընդգծել է Ջ. Թոմասը:
Իսկ Վիրահատարանի սենյակի համակարգող Ռեգինա Ուվելսն էլ «Մոր և մանկան առողջության պահպանման կենտրոն»-ում լապարասկոպիկ և հիստերոսկոպիկ սարքերը փորձարկել է և տեղի մասնագետներին բացատրել դրանց օգտագործման ձևերը: «Լապարասկոպիկ վիրահատությունն ավելի կարճ է տևում և քիչ տրավմա է պատճառվում հիվանդներին: Ուրախ եմ, որ արցախցիների համար իմ ներդրումն ունեմ: Շոյված եմ՝ ԱՀ ղեկավարության և բուժաշխատողների կողմից մեզ այսպիսի ջերմ ընդունելության արժանացնելու համար»,-նշել է Ռ. Ուվելսը:
