Մյունխենում մեկնարկել է պանելային քննարկում Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի, Վրաստանի վարչապետ Իրակլի Ղարիբաշվիլիի ու ԵԱՀԿ ԳՔ Հելգա Մարիա Շմիդտի մասնակցությամբ։
Փաշինյանը պանելային քննարկմանը նշել է, որ Հարավային Կովկասի նկատմամբ միջազգային ուշադրության թուլացումը հղի է ռիսկերով.
«Մինչ միջազգային հանրության ուշադրությունը հասկանալիորեն կենտրոնացած է Ուկրաինայի վրա, Հարավային Կովկասի համար կարող են նոր ռիսկեր առաջանալ»,- ասել է նա։
Ըստ Փաշինյանի` Հայաստանը հետամուտ է ժողովրդավարական բարեփոխումներին և ամրապնդում է օրենքի գերակայությունը երկրում:
Փաշինյանը նաև անդրադարձել է Լաչինի միջանցքի փակման թեմային. «Միջանցքն արդեն 70 օր արգելափակված է, ինչը հանգեցրել է հումանիտար և էներգետիկ ճգնաժամի ԼՂ-ում, և գազամատակարարումը 10 անգամ դադարեցվել է անցած 70 օրերի ընթացքում»։
«2020 թվականի նոյեմբերի 9-ի եռակողմ հայտարարության մեջ Լաչինի միջանցքի վերաբերյալ հստակ խոսք է հնչել. Ադրբեջանի և ռուս խաղաղապահների պարտականությունն է ապահովել Լաչինի միջանցքի շահագործումը։ Բայց հիմա իրականությունը բոլորովին այլ է», – գրել է նա։
