Ermenihaber.am-ը գրում է, որ «Իսլամական պետություն» (ԻՊ) ահաբեկչական կազմակերպության զինյալները Թուրքիայի տարածքով գումարի դիմաց անցնում են Եվրոպա:
Ըստ թուրքական «Haberler.com» լրատվական կայքի՝ Թուրքիայի տարածքով ահաբեկիչների անօրինական անցումն ապահովելու համար վերջիններից պահանջվող գումարի չափն այժմ հասել է 3000 դոլարի:
Նշվում է, որ նախկինում այդ «ծառայությունները» թուրք մաքսանենգները մատուցում էին 1000 դոլարով, սակայն «սակագները» բարձրացել են այն բանից հետո, երբ սիրիական Ռաքքա և Դեր Զոր քաղաքները ԻՊ-ի ահաբեկիչներրից մաքրելուց հետո վերջինները սեղմվեցին Մայադին շրջանում: Ահաբեկչական կառույցի փաստացի կազմալուծումից հետո Եվրոպայից ԻՊ-ի շարքերը համալրած շատ ահաբեկիչներ ձգտում են վերադառնալ իրենց երկրներ:
Ըստ թուրքական աղբյուրի՝ ահաբեկիչները սկզբում ուղարկում են իրենց կանանց, որոնց անցման գինն ի տարբեություն տղամարդ ահաբեկիչների, տատանվում է 1000 դոլարի շրջանում, ապա իրենք են լքում կառույցի շարքերը:
Նշվում է, որ Թուրքիայի տարածքով անօրիինական ճանապարհով Եվրոպա են անցնում նաև Սիրիայի քրդական ուժերի (Ժողովրդի պաշտպանության ուժեր-YPG) զինյալներ, որոնց անցումը արժի 1000 դոլար:
