Սահմանադրական դատարանն այսօր հրապարակեց «Լուսավոր Հայաստանի» դիմումի վերաբերյալ իր որոշումը. Վանաձորի ավագանու գումարած նիստերը հակասահմանադրական են. ««Տեղական ինքնակառավարման մասին» ՀՀ օրենքի 64-րդ հոդվածի 3-րդ կետը հակասահմանադրական է։ Վանաձորի համայնքի ավագանու առաջին նիստի՝ 2017թ. մարտի 31-ի N 2-Ն, 7-Ն, 8-Ն, 9-Ն որոշումները հակասահմանադրական են»,-նշեց ՍԴ նախագահ Գ. Հարությունյանը։
Հիշեցնենք, որ Վանաձորում նախորդ տարի կայացած ՏԻՄ ընտրություններից հետո՝ ավագանու «Լուսավոր Հայաստան», «Բարգավաճ Հայաստան» և «Հայկական վերածնունդ» խմբակցությունները բոյկոտում են նիստերը, իսկ Վանաձորի քաղաքապետ Մամիկոն Ասլանյանը շարունակում է նիստեր գումարել, որոշումներ ընդունել:
ԱԺ «Ելք» խմբակցության պատգամավորներ Էդմոն Մարուքյանն ու Արտակ Զեյնալյանը, ՍԴ որոշման հրապարակումից հետո՝ ընդգծեցին, որ իրենց պահանջն ամբողջությամբ բավարարված է. «ՍԴ-ն այդ նորմը հակասահմանադրական ճանաչեց ու դրա հիման վրա կայացված նիստերի որոշումները ևս իրավական ուժ չեն ունենա»,- նշեց Ա. Զեյնալյանը:
«ՍԴ-ն ասաց՝ այն նորմով, որ մինչև հիմա նիստեր եք գումարել, իբր, քվորում ապահովել, հակասահմանադրական է, հետևաբար բոլոր գումարված նիստերը, որ չեն ունեցել քվորում, հակասահմանադրական են, ու, ըստ էության, ավագանին պետք է լուծարվի»,- ընդգծեց նա՝ հավելելով, որ լուծարումից հետո Վանաձորում պետք է տեղի ունենա արտահերթ ընտրություն:
ՍԴ-ի որոշումներն ուժի մեջ կմտնեն 2018 թ.-ի մարտի 31-ին։
ArmLife.am