Օրվա ընթացքում շարունակվել են համառ մարտերը գրեթե ողջ սահմանի երկայնքով, մասնավորապես թեժ են եղել Հյուսիսային եւ Հարավային ուղղությունները, հայկական բանակի ստորաբաժանումները վարելով թեժ մարտեր՝ արձանագրել են զգալի հաջողություններ: Այս մասին այսօր` սեպտեմբերի 29-ին, հրավիրված մամուլի ասուլիսին հայտնեց ՊՆ ներկայացուցիչ Արծրուն Հովհաննիսյանը:
«Ընդհանուր առմամբ պատերազմը սկսվելու առաջին պահից ի վեր հակառակորդը կորցրել է 790 զինծառայող, որից 180-ը Քարվաճառի ուղղությամբ, որտեղ ընթացել են բավականին համառ եւ դժվար մարտեր: Մոտավոր ունեն 1900 վիրավոր: Հայկական ստորաբաժանումները հակատանկային տարբեր միջոցներից, նաեւ ոչ հակատանկային միջոցներից խոցել են 137 տանկ եւ զրահատեխնիկա են խոցել հակառակորդի: Ոչնչացվել է ադրբեջանական 72 ԱԹՍ, 7 ուղղաթիռ եւ մեկ ինքնաթիռ: Մարտերը շարունակվում են, մեր զինված ուժերը հստակ կատարում են իրենց առջեւ դրված խնդիրները, հակառակորդի բոլոր հարձակվողական գրոհները հետ են մղվում՝ համապատասխան կորուստներ պատճառելով»,-ասաց նա:
Արծրուն Հովհաննիսյանը հավելեց՝ այսօր աննախադեպ էր այն իմաստով, որ հարձակման ենթարկվեց ՀՀ Վարդենիսի տարածաշրջանը:
«Հարձակման ենթարկվեց հրթիռներից եւ մարտական ԱԹՍ-ներից, մենք այսօր Վարդենիսի ուղղությունից ցուցադրեցինք կադրեր` ինչպես է թիրախավորվում խաղաղ բնակչությունը, քաղաքացիական ենթակառուցվածքները, ավտոբուս, գյուղի ջրատար եւ այլն»,-ասաց նա:
