ԲՀԿ նախագահ Գագիկ Ծառուկյանը երեկ հրավիրված ԲՀԿ քաղխորհրդի նիստում հայտարարեց, որ գործող իշխանությունը 100 տոկոսով ձախողվել է և այն ենթակա է փոփոխման: Իշխանությունը` ի դեմս վարչապետի պաշտոնը զբաղեցնող Նիկոլ Փաշինյանի մամուլի խոսնակ Մանե Գևորգյանի, Ծառուկյանի քննադատությանը պատասխանել է նրա նկատմամբ քրեական գործեր հարուցելու սպառնալիքով: Մանե Գևորգյանը սպառնում է նաև Գագիկ Ծառուկյանի գույքը խլելով, որպես ապօրինի ձեռք բերված:
Իշխանությունը բացահայտում է իր էությունը, ցույց տալով, որ ինքը ոչնչով չի տարբերվում նախորդ իշխանությունից, և իր միակ հենարանը շանտաժն ու սպառնալիքներ են: Սա օրինաչափ է, որովհետև հանրային աջակցությունը կորցրած և պետական կառավարումը տապալած իշխանությունը չունի այլ հենարան քան շատաժն ու բռնությունն է:
Հիշողության թարմացման համար նկատենք, որ 2015թ. Գագիկ Ծառուկյանը երկրում առկա սոցիալ տնտեսական ճգնաժամը հաղթահարելու համար հայտարարել էր քաղաքական համախմբման գործընթաց սկսելու մասին, որին միացել էին մի քանի տասնյակ քաղաքական և հասարակական ուժեր, այդ թվում Հայ ազգային կոնգրեսը, Հայաստանի ժողովրդական կուսակցությունը, Ժառանգությունը:
Այն ժամանակվա նախագահ Սերժ Սարգսյանը Ծառուկյանին լռեցնելու համար դիմեց շանտաժի օգնությանը` հայտարարելով, որ Ծառուկյանը բարեգործությամբ է զբաղվել պետությանը չմուծած հարկերի հաշվին և նա տեղ չունի քաղաքականության մեջ: Հետագայում, իհարկե, որևէ ապացույց այդպես էլ չներկայացվեց, բայց դա այլևս էական չէր: Ծառուկյանն ըստ էության զիջեց այդ ճնշմանը, քանի որ մի գիշերվա ընթացքում իշխանությունը կալանավորեց Ծառուկյանի հարյուրավոր կողմնակիցների, իսկ Ծառուկյանը հայտարարեց, որ չի ցանկանում թույլ տալ, որ թափվի անմեղ մարդկանց արյունը:
Հետագայում տեղեկություններ տարածվեցին, որ եղել էին սպառնալիքներ նաև Ծառուկյանի ընտանիքի անդամների հասցեին, որոնք կարող էին իրականություն դառնալ, նկատի ունենալով իշխանության հանցավոր էությունը:
Հիմա իրավիճակը ոչնչով չի տարբերվում հինգ տարի առաջ տեղի ունեցածից: Ծառուկյանը հայտարարում է, որ կառավարությունը տապալվել է բոլոր ուղղություններով՝ սկսած տնտեսականից մինչև առողջապահական և արտաքին քաղաքականություն և հասարակական քաղաքական ուժերի համախմբան կոչ է անում, երկիրն այս իրավիճակից դուրս բերելու համար:
Իշխանությունը պատասխանում է քրեական գործեր սարքելու և Ծառուկյանի ունեցվածքը խլելու սպառնալիքներով: Մենք ուղղակի վստահ ենք, որ ի տարբերություն 2015թ. Ծառուկյանը այս անգամ չի ընկրկի այդ սպառնալիքների առաջ, քանի որ ի տարբերություն 2015թ. այսօր իշխանությունը այնքան թույլ է, որ նույնիսկ ֆիզիկական ուժ կիրառելու համարձակություն և ռեսուրս չունի: Մենք վստահ ենք, որ այս անգամ Ծառուկյանը մինչև վերջ կտանի քաղաքական և հասարարաական դաշտը համախմբելու և երկիրը այս վիճակից դուրս բերելու իր ծրագիրը:
ArmLife.am