«Հրապարակ» թերթը գրում է. Քննչական կոմիտեն Ազգային անվտանգության ծառայության հետ միասին երեկ լայնածավալ գործողություններ իրականացրեց առողջապահության նախարարությունում, նախարարությանը ենթակա ՊԱԳ-ում` պետական առողջապահական գործակալությունում, որը պետպատվերի բաշխումն է իրականացնում, եւ Անահիտ Ավանեսյանի անվան հետ կապվող «Ուիգմոր» ԲԿ-ում, որտեղ նրա ընկերը` Զավեն Քոլոյանն է տնօրենը: Կային բերման ենթարկվածներ, ձերբակալվածներ։ Ի՞նչ է կատարվում, եւ ո՞րն է իրավապահների գործողությունների հիմքը։ Մենք ուղիղ մեկ ամիս առաջ` մարտի 15-ին գրել էինք, որ ՊԱԳ տնօրեն, Ավանեսյանի մտերիմ Ահարոն Բարսեղյանին անսպասելիորեն կանչել են նախարարություն եւ ասել, որ դիմում գրի, ազատվի: Մի քանի օրից գրել էինք, որ Ահարոն Բարսեղյանի հետ կապված քրեական վարույթ կա, որի հիմքում «Ուիգմոր քլինիք»-ին մեծաքանակ պետպատվեր տրամադրելու փաստն է: Ավելին` Բարսեղյանն իր հետ փոխկապակցված մեկ այլ ընկերությամբ «Ուիգմորին» խորհրդատվություն է իրականացրել, որը եւս ուսումնասիրվում էր։ Մի խոսքով` նախարարի անվան հետ կապվող նորաստեղծ ԲԿ-ն մեծ պետպատվեր է ստացել, եւ վարույթը հարուցվել է մրցակից կլինիկաների բողոքի հիման վրա: Չնայած Ահարոն Բարսեղյանն այդ ժամանակ հերքում էր որեւէ գործի առկայությունը, ինչպես այժմ նախարարն է հերքում, բայց ակնհայտ է, որ սա բազմաթիվ անհայտներով հավասարում է: Եվ իրավապահները հասել են նախարարության աշխատակազմին:
Մեզ պատմեցին նաեւ, որ երբ առողջապահական համակարգում հայտնվում է բուժսպասարկում իրականացնող նոր կազմակերպություն, այն աշխատում է առանց պետպատվերի, մինչեւ որ կապացուցի, որ որակյալ բուժսպասարկում է իրականացնում: Դրանից հետո սկզբնական փուլում պետությունից ստանում է սիմվոլիկ գումար, օրինակ՝ 20 միլիոն դրամ։ Առողջապահության նախարարության պատմության մեջ բացառիկ դեպք է եղել, երբ նորաստեղծ կլինիկան ստանում է շուրջ 600 միլիոն դրամի պետպատվեր։ Եվ բնական է, որ այստեղ դեր է խաղացել Անահիտ Ավանեսյանի գործոնը: Նրա մտերիմ, նախկին աշխատակից Ահարոն Բարսեղյանը, ըստ մեղադրանքի, չի ուսումնասիրել «Ուիգմոր»-ի գործունեությունը, անգամ կատարողականը՝ սպասարկումը, եւ շռայլորեն պետպատվեր է տրամադրել։ Դրա համար ԲԿ-ի ռեանիմացիոն ծառայության մակարդակը 2-րդից բարձրացրել է 3-րդ մակարդակի։ Իսկ ի՞նչ է նշանակում 2-րդ եւ 3-րդ մակարդակ։
Ըստ տեխնիկական հագեցվածության՝ 2-րդ մակարդակի դեպքում ռեանիմացիայում 1 օր մահճակալ տրամադրելու համար ԲԿ-ն ստանում է 1 հիվանդի համար 20 հազար դրամ, 3-րդի դեպքում՝ պայմանական 70-80 հազար դրամ։ Պետությունն ավելի շատ գումար է տալիս 3-րդ մակարդակի ռեանիմացիա ունեցող ԲԿ-ներին, քանի որ սպասարկման որակը եւ ծախսերն այս դեպքում ավելի բարձր են։ Ինչպե՞ս է սխեման գործել։ Առողջապահության նախարար Անահիտ Ավանեսյանի հրամանով գործում է հանձնաժողով, որը գնահատում է ԲԿ պայմանները, այդ թվում` ռեանիմացիայի պայմանները: Հանձնաժողովն էլ, ըստ լուրերի, ուռճացրել է «Ուիգմոր»-ի սպասարկման որակը, որ ԲԿ-ն 3-րդ մակարդակ ստանա, ու հիմնավորվի պետբյուջեից 600 միլիոն դրամի հատկացումը։ Այս հանձնաժողովի անդամ է եղել նաեւ Ահարոն Բարսեղյանը։ Պարզ է, որ Ահարոն Բարսեղյանը միայնակ եւ ինքնագլուխ չի եղել։ ՊԱԳ-ի ղեկավարն անմիջապես ենթարկվում է առողջապահության նախարարին։ Բարսեղյանը ժամանակին աշխատել է նաեւ Անահիտ Ավանեսյանի մորը՝ Մարգարիտա Վարդանյանին պատկանող հիվանդանոցում։ Մամուլը բազմիցս գրել է, որ Պուշկինի փողոցում գտնվող հիվանդանոցի շենքը, որն «Ուիգմորը» վարձակալել է, պատկանում է Ավանեսյանի մորը։ Ավելին՝ խոսակցություններ կան, որ Ավանեսյանների ընտանիքը բաժնեմաս ունի այս հիվանդանոցում, որն արդեն գործում է Արաբկիր համայնքում։ Ահարոն Բարսեղյանը, ով անցյալում «Ուիգմոր»-ի հաշվապահն էր, Ավանեսյանի՝ նախարար դառնալուց հետո նշանակվել է ՊԱԳ-ի ղեկավար եւ անգամ իր նախորդի` դատարանով վերականգնվելուց հետո, մի կարճ ժամանակ չպաշտոնավարելուց հետո վերադարձել է նույն պաշտոնին։
Իրավապահները հեռուն գնացող մտադրություններով են մտել առողջապահության նախարարություն, ՊԱԳ եւ «Ուիգմոր»՝ վստահ, որ այս «գործը» մեկ-երկու հոգու բան չէ, այլ կազմակերպված խմբի։ Ավանեսյանը կարժանանա՞ Վահան Քերոբյանի ճակատագրին, դեռ պարզ չէ: Գործի շրջանակներում երեկ բերման էր ենթարկվել նաեւ «Ուիգմոր»-ի ղեկավար Զավեն Քոլոյանը: Նա, Ահարոն Բարսեղյանն ու Անահիտ Ավանեսյանը մտերիմներ են, նրանց հաճախ կարելի է տեսնել Աբովյան-Թումանյան խաչմերուկի ռեստորաններից մեկում։
