Օրերս «Ժամանակ» թերթը գրել էր, թե Սամվել ԱԼեքսանյանին պատկանող «Ալեքս տեքստիլ» ընկերության արտադրանքով բաձված բեռնատարները Ռուսաստանի Դաշնությունից հետ են ուղարկվել Հայաստան:
Պատճառը այդ ապրանքների բարձր արժեքն է, որոնք մրցունակ չեն ռուսական շուկայում»:
Հայաստանի տնտեսական զարգացման և ներդրումների նախարարության ճյուղային տնտեսական քաղաքականության վարչության պետ Արմեն Եգանյանը շուտափույթ հերքել է այդ տեղեկատվությունը.«Մենք, ինչպես մյուս բոլոր ընկերությունների, այնպես էլ «Ալեքս տեքստիլ» ընկերության հետ ամենօրյա կապի մեջ ենք` կապված իրենց խնդիրների հետ: Ամբողջ տեղեկատվությունը նաև ընկերությունը տրամադրում է մեզ, սակայն նման տեղեկատվություն մենք չունենք: Ես կարծում եմ, որ դա այդպես չէ, որովհետև ընկերությունը բավականին լուրջ արտահանման ծավալներ ունի, աշխատում է հիմնականում ռուսական շուկայի հետ»,-ասել է Եգանյանը:
Նշենք, որ «Ալեքս տեքստիլ» ընկերությունը Սամվել Ալեքսանյանի բիզնեսներից մեկն է, արտադրանքը սպառվում է նաև Հայաստանում: Այն, որ հայստանյան շուկայում Ալեքսանյանի ընկերության արտադրանքն այնքան էլ մեծ սպառում չունի՝ իր թանկ լինելու պատճառով, երկու կարծիք չկա: Միաժամանակ, որքան էլ խոսեն, թե ընկերությունը հագեցած է ոլորտի համար ամենաժամանակակից սարքավորումներով, միևնույնն է, կա մի լուրջ խնդիր, որն առկա է Սամվել Ալեքսանյանի գրեթե բոլոր ընկերություններում` դա մարդկային ռեսուրսի աշխատաժամերն ու դրան համարժեք վարձատրությունն է: Օրինակ՝ նույն տեքստիլում 9-10 ժամ աշխատելու դիմաց աշխատավարձը կազմում է 60 000- 80 000 դրամ, մեկ այլ ընկերությունում` ժամը 8-ից 23.00 աշխատելու դեպքում` 80 000 դրամ: Այստեղ է խնդիրը կուտակվում, այնպես որ, կարևոր չէ, թե մի մեքենա ապրանք հասավ Ռուսաստան, թե ետ եկավ: Ուշագրավն այն է, որ Սամվել Ալեքսանյանի մոտ ճորտատիրական կարգերը մնայուն տեղ են զբաղեցնում: