Armsport.am-ը գրում է, որ Միլանի «Ինտերը» ձմեռային տրանսֆերային պատուհանի ժամանակ ցանկանում է նոր կիսապաշտպան գնել: «Ներաձուրիների» թիրախում են հայտնվել ՊՍԺ-ի ֆուտբոլիստ Խավիեր Պաստորեն և «Մանչեսթեր Յունայթեդի» խաղացող Հենրիխ Մխիթարյանը:
Ինչպես հայտնում է «La Gazzetta dello Sport»-ը, միլանյան ակումբը հենց այս երկու խաղացողների մեջ է ընտրություն կատարելու: Նշվում է, որ «Ինտերը» կիսապաշտպաններից մեկին վարձակալության հիմունքներով կհրավիրի թիմ, քանի որ խնդիրներ ունի ֆինանսական ֆեյր փլեյի հետ և տրանսֆերներ իրականացնել չի կարող:
Վարձակալության ավարտից հետո պարզա կդառնա՝ կցանկանա ակումբն ամբողջությամբ գնել ֆուտբոլիստի տրանսֆերը, թե՝ ոչ:
Հենրիխ Մխիթարյանը կորցրել իր տեղը մանկունիանցիների կազմում՝ վերջին ամսվա մեջ երկու անգամ դուրս գալով խաղադաշտ: Հայ ֆուտբոլիստն ընդհանուր առմամբ 40 րոպե է անցկացրել խաղադաշտում:
Խավիեր Պաստորեն, չնայած հաճախ է հայտնվում փարիզցիների կազմում, այնուամենայնիվ ցանկանում է ավելի շատ խաղաժամանակ ստանալ:
Իտալական լրատվամիջոցները նշում են, որ թե Պաստորեի, թե Մխիթարյանի ակումբները համաձայն են հրաժարվել խաղացողների ծառայություններից: Այժմ հերթը միլանցիներինն է, ովքեր պետք է ընտրություն կատարեն երկու ֆուտբոլիստների միջև: