Վերջին օրերին տեղեկատվություն է ստացվում, որ 2020 թվականի մայիսի 14-ից տնտեսական սահմանափակումների մեղմացման շրջանակներում մի շարք մարզական և այլ խմբակներ վերսկսել են իրենց գործունեությունը:
Այս կապակցությամբ տեղեկացնում ենք, որ ՀՀ պարետի 2020 թվականի մայիսի 3-ի թիվ 63 որոշման համաձայն՝ շարունակում է ժամանակավորապես սահմանափակված լինել «85.5 Այլ կրթություն» հատվածը:
Պարզաբանման համար նշենք, որ «85.5 Այլ կրթություն»-ը ներառում է կրթական գործունեությունը հետևյալ բնագավառներում՝
Սպորտ
–մարզադպրոցներում, սպորտային խմբակներում, շուրջօրյա մարզաճամբարներում տեսության դասավանդում և գործնական հմտությունների ուսուցում բասկետբոլի, վոլեյբոլի, ֆուտբոլի, թեթև ատլետիկայի, լողի և այլ մարզաձևերում
–հրահանգիչների, ուսուցիչների գործունեություն տարբեր մարզաձևերում
Ռազմամարզական, մարտարվեստի և այլ արտադպրոցական ուսուցում– ռազմական, մարտարվեստի, յոգայի խմբակների, կենտրոնների և համանման այլ կազմակերպությունների գործունեություն, նպատակաուղղված կիրառական գիտելիքների ձեռքբերմանը
Մշակույթ
–արտադպրոցական դաստիարակություն և կրթական գործունեություն, որն ուղղված է տեսության դասավանդմանը և գործնական հմտությունների ուսուցմանը երաժշտությունում, գեղանկարչությունում, թատրոնի և արվեստի այլ ձևերում: Այստեղ ուսուցումը դիտվում է որպես հոբբի, հանգիստ և ինքնազարգացում: Այս ենթադասում ընդգրկվող կազմակերպություններն ուսուցման ավարտից հետո չեն տրամադրում մասնագիտական կրթության մասին դիպլոմ կամ աստիճան:
Մասնավորապես ներառում է`
–երաժշտական գործունեություն
–մանկապատանեկան uտեղծագործական և գեղագիտական կենտրոնների գործունեություն
–պարի դպրոցների (խմբակների) գործունեություն
–թատերական դպրոցների (խմբակների) գործունեություն
–լուսանկարչական դպրոցների (խմբակների) գործունեություն
Վարորդական դպրոցներ
–Ավտոսիրողների վարորդական դպրոցների գործունեություն
–օդային և ջրային տրանսպորտի, այդ թվում` առագաստանավերը, վարման ուսուցում (առանց մասնագիտական գործունեությամբ զբաղվելու համար արտոնագրերի և սերտիֆիկատների տրամադրման)
Այլ կրթություն
–Հաշվապահական դասընթացներ
–Օտար լեզուների դասընթացներ
–Համակարգչային դասընթացներ
–Բարձրագույն և այլ ուսումնական հաստատություններ ընդունվելու համար նախապատրաստական դասընթացներ
–Նեղ մասնագիտական գիտելիքների ձեռքբերման այլ դասընթացներ
Ներառում է մասնագիտական որակավորման բարձրացման, ուսուցման և նեղ մասնագիտական հմտությունների ձեռք բերման դասընթացներ, այլ կրթություն՝ չներառված ուրիշ խմբավորումներում, մասնավորապես՝
–կրոնական ուսուցումը
–ջրային փրկարարների ուսուցումը
–գոյատևման վարժանքների ուսուցումը
–հռետորական արվեստի ուսուցումը
–արագ ընթերցման ուսուցումը
«Հորդորում ենք զերծ մնալ արտակարգ դրության պայմաններում սահմանված կարգավորումները շրջանցելու և/կամ յուրովի մեկնաբանելու պրակտիկայից՝ հանուն մեր քաղաքացիների առողջության և անվտանգության պահպանման»,- ասված է պարետատան տարածած հաղորդագրության մեջ:
