«Հայկ Ալումյանը պիտի իր անունը փոխի, որովհետև այդ անունը կրելը պատիվ չի բերում «Հայկ» անունը կրող մյուս քաղաքացիներին»,- այս մասին Ազգային ժողովում լրագրողների հետ զրույցում ասաց «Իմ քայլը» խմբակցության պատգամավոր Հայկ Սարգսյանը:
Անդրադառնալով ֆեյսբուքյան իր աղմկահարույց գրառմանը, որի վերաբերյալ նաև Հայկ Ալումյանը մամուլի ասուլիսում էր անդրադարձել, Հայկ Սարգսյանը նշեց, որ ինքը գրառում չի արել, այլ կիսվել է մեկ այլ գրառմամբ, ինպես նաև չի ջնջել, և այն շարունակում է մնալ իր ֆեյսբուքյան էջում: Լրագրողների հարցից կիսաբորբոքված պատգամավորը նկատեց.
«Նույն Հայկ Ալումյանը մեկ տարի առաջ նույն ձևով գրառումներ էր անում և հարվածում էր նախկին իշխանություններին ամենախիստ ձևով: Անգամ ես նման մեկնաբանություններ չէի անում: Հայկ Ալումյանը, Շիրխանյանի պաշտպանը լինելով հանդերձ, նույն ընթացքում, երբ Շիրխանյանը ցուցմունք էր տալիս Ռոբերտ Քոչարյանի դեմ, շատ կարճ ժամանակ հետո եկել և դարձել է Ռոբերտ Քոչարյանի պաշտպանը: Ես նրան ընդհանրապես մեկնաբանելու խնդիր չունեմ: Հայկ Ալումյանն այն մարդն է, ով հրազենով ինձ վրա հարձակված մարդու շահերն է պաշտպանում դատարանում»,-ասաց Հայկ Սարգսյանը:
Արձագանքելով լրագրողների նկատառմանը, թե Հայկ Ալումյանը փաստաբան է, Հայկ Սարգսյանը պատասխանեց հարցադրումով. «Ի՞նչ կապ ունի նրա փաստաբան լինելը, եթե շահերի բախման մասին եք մտածում»:
Հայկ Սարգսյանը նշեց` ինչպե՞ս կարող է մեկ փաստաբանը պաշտպանել երկու մարդկանց, ովքեր միմյանց դեմ ցուցմունք ենք տալիս: Ամփոփելով իր խոսքը, Հայկ Սարգսյանը նշեց, որ Հայկ Ալումյանը միայն մեկ ճիշտ բան կարող է անել` փոխել իր անունը:
