Ուժեղ «սպայկա» են, մկան պես կրում ու տանում են

«Ժողովուրդ» թերթում կարդում եմ, որ Հայաստանի սննդամթերքի անվտանգության տեսչական մարմնի աշխատակազմի ղեկավար Արմեն Միրզոյանը, երկար տարիներ պետական պաշտոններ զբաղեցնելով, հասցրել է շատ լուրջ ունեցվածք կուտակել:

Նրա դրամական միջոցները կազմում են 75 մլն դրամ, 330 հազար դոլար եւ 18 հազար եվրո: Իսկ նրա միակ եկամուտը իր աշխատավարձն է, որը անցած տարում ամսական կազմել է մոտ 508 հազար դրամ:

Միրզոյանի տիկինը` Հասմիկ Բադալյանը, ավելին ունի- 15 մլն դրամ, 9 մլն դոլար, 7000 եվրո եւ 250 հազար ռուսական ռուբլի: Կնոջ եկամուտները տրված փոխառությունների դիմաց ստացված տոկոսն է` 2 հազար դոլարի չափով, եւ ամսական 16 հազար դրամ կենսաթոշակը:

Միրզոյանի անձը այստեղ ամենևին էլ կարևոր չէ, պարզապես նրա օրինակի վրա ակնհայտ երևում է, թե կոռռուպցիան ինչքան խորն է մտել իշխանության ամենատարբեր շերտերի մեջ: Ակնհայտ է, որ Միրզոյանի նմանները լիքն են պետական ապարատում, ով ինչ կարողացել է ու կարողանում է, գողացել է ու գողանում է: Այսօր բոլոր մինիստրությունների, կոմիտեների, տեսչությունների բաժնի վարիչներից բարձր օղակներում հաստատված է շատ գործուն կոռուպցիոն սխեմաներ: Ատկատներ, տեղական գրանտներ, գնումներ, պատվերներ սեփական բիզնեսին, պետության հաշվին գործուղումներ, հովանավորչությամբ կամ կաշառքով պաշտոնի նշանակել կամ գործի տեղավորել,- ահա այն չնչին թվարկումը կոռուպցիոն սխեմաների, որ աշխատում է ամենուր: Սրանից մի հազար դոլլար, մյուսից մի ուրիշ հազար, մեկ էլ պարզվում է, որ թոշակառու կինդ արդեն մի 10 միլիոն դոլլար ունի: Այս սխեմաներն ամենևին էլ գաղտնիք չեն, բոլորը գիտեն, ով ով է, ինչ է շնչում ու արտաշնչում:

Ու գիտեք, թե ինչն է հետաքրքիր,ոնց կասեր կարգին հաղորդման Հայկոն` ոնց որ գալուբոյները, այնպես էլ էս միջին օղակի չինովնիկները ուժեղ սպայկա են, քանի որ մեկի պոչը մյուսի տակին է: Նրանք, Կորեյկոյի պես, երբեք աչքի չեն ընկնում, քաղաքական ելույթներ չեն ունենում, գտնում են իրենց տաքուկ անկյուններն ու թալանում են, մկան պես կրում են ու տանում:

Եվ ամենևին չեմ զարմանա, եթե մի օր պարզվի, որ Աշոտյանը, Շարմազանովը կամ նման այլ ախմախները ամենևին էլ լուրջ ֆինանսներ չունենան: Նրանց ասել են` դուք մենակ խոսեք, դուք գործ չունեք, մենք հավերժ ենք, դուք միշտ լավ կապրեք, խնդիր չեք ունենա:

Բայց այսօր պարզվել է, որ նրանք խնդիրներ ունեն, իսկ երկիրը թալանողները` դեռ աշխատում են պետական ապարատում.
Հակոբ Սարգսյանի ֆեյսբուքյան էջից