«Սասնա ծռերի» 11 անդամի գործով Շենգավիթի նստավայրում ընթացքող դատական նիստում այս պահին քննվում են ամբաստանյալների խափանման միջոցը փոխելու մասին միջնորդությունները: Փաստաբանները հիմնավորումներ են բերում, թե ինչու պետք է իրենց պաշտպանյալների խափանման միջոց կալանքը փոխվի:
Նրանց խոսքով՝ «Սասնա ծռեր»-ին մինչ օրս կալանքի տակ են պահել բացառապես քաղաքական նպատակներով, իսկ այսօր երկրում իրավիճակ է փոխվել, հետևաբար պետք է որոշում կայացնելիս՝ հաշվի նստել այդ հանգամանքի հետ:
Այս պահին փաստաբանները շարունակում են ամբաստանյալների խափանման միջոցը փոխելու վերաբերյալ հիմնավորումներ ներկայացնել:
Նշենք, որ «Սասնա ծռերի» 11 ամբաստանյալների՝ Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյանի, Գևորգ Իրիցյանի, Թորոս Թորոսյանի գործով նիստը նախագահում է դատավոր Արշակ Վարդանյանը:
«Սասնա ծռերի» գործով 11 ամբաստանյալների խափանման միջոցը փոխելու միջնորդության որոշումը դատարանը կհրապարակի այսօր՝ մայիսի 11-ին, ժամը 17:45-ին: Այս մասին Երեւանի ընդհանուր իրավասության դատարանի Շենգավիթի նստավայրում հայտարարեց գործով նախագահող դատավոր Արշակ Վարդանյանը եւ հեռացավ խորհրդակցական սենյակ:
Հիշեցնենք, որ օրեր առաջ դատարանը փոխեց նաև «Ոտքի Հայաստան» շարժման անդամ «Սասնա ծռեր»-ի գործով մեղադրվող Անդրիաս Ղուկասյանի խափանման միջոցը՝ ստորագրությամբ երկրից չհեռանալու պայմանով:
