Երեւանի քաղաքապետարանի Հանրակրթության վարչության պետի տեղակալ Անահիտ Մելքոնյանը քաղաքապետի հանձնարարականով այսօր այցելել էր Երեւանի Մոնթե Մելքոնյանի անվան թիվ 11 դպրոց: Ըստ նրա՝ ստացված բողոքների ուսումնասիրության արդյունքում եզրակացության կարվի և որոշում կկայացվի: Անահիտ Մելքոնյանը նաև հիշեցրեց, որ նախկինում էլ են եղել բողոքներ տնօրենի դեմ, հանձնախումբ է կազմվել, որի կազմում եղել է նաեւ Անահիտ Բախշյանը. «Հանձնախումբը ուսումնասիրություններ է կատարել, ոչինչ չի արձանագրվել, ոչ մեկ բանավոր չի բողոքել: Ինչպես ասում էր տիկին Բախշյանը՝ փաստաթղթերն անթերի են եղել: Հիմա եկել ենք անանուն բողոքի հետքերով եւ արդյունքում նման երեւույթների ականատես եղել: Ուղղակի սիրտս ցավում է, որ երեխաներին մասնակից են դարձնում այս ամենին: Կուզեի բոլոր մեծերին կոչ անել երեխաներին մասնակից չդարձնել նման գործերի, նրանք թող իրենց կրթությամբ զբաղվեն »::
Դպրոցի նախկին մաթեմատիկայի ուսուցիչներից մեկն էլ ընդգծեց, որ տնօրեն Ազիզյանը շատ անհարգալից է վարվել ուսուցիչների հետ և ստորացրել է նրանց՝ անվանելով «հավեր». «Կանչում էր աշխատասենյակ, մեզ նսեմացնում էր, ասում էր դուրս գնա, հիմա ես եմ եկել, որ ասեմ` դուրս գնա: Նրան պետք է շպրտել դպրոցից, հիմա ամեն ինչ հարամ է լինում իր գլխին: Ասում էր` ուր ա էն հավը, չի կարելի չէ: Ինձ հետ շատ բողոքողներ կլինեն, բայց հիմա բոլորը զբաղված են»:
Հիշեցնենք, որ երեւանի ավագանու «Ելք» խմբակցության անդամները երեկ դիմում են ներկայացրել քաղաքապետ Տարոն Մարգարյանին` տնօրենի հետ աշխատանքային պայամնագիրը լուծարելու պահանջով:
Ի դեպ, Մոնթե Մելքոնյանի անվան թիվ 11 դպրոցի տնօրեն Ռուզաննա Ազիզյանը ՀՀԿ անդամ է և ՀՀ պաշտոնաթող նախագահ Սերժ Սարգսյանի համակուրսեցին է: