Ռուսաստանի նախագահական ընտրություններում քվեարկությունը մեկնարկել է: Մարտի 15-ի առավոտյան տեղամասերը բացվել են արևելյան մարզերում, այնուհետև ամբողջ երկրում: Քվեարկությունը կտևի երեք օր, մարզերի մեկ երրորդում այն կլինի նաև էլեկտրոնային: Կասկած չկա, որ քվեարկության արդյունքներով հինգերորդ անգամ նախագահ կդառնա Վլադիմիր Պուտինը, գրում է BBC-ն:
Պուտինի երեք մրցակիցներն են՝ Կոմունիստական կուսակցության պատգամավոր Նիկոլայ Խարիտոնովը, Լիբերալ-դեմոկրատական կուսակցության ղեկավար Լեոնիդ Սլուցկին և Պետդումայի փոխխոսնակ Վլադիսլավ Դավանկովը: Պարբերականը նշում է, որ նրանցից ոչ մեկ չի դատապարտում Ուկրաինայի դեմ պատերազմը և ուղղակիորեն չի քննադատում Պուտինին:
Հիշեցնենք` գործող նախագահ Վլադիմիր Պուտինն արդեն հինգերորդ անգամ է հավակնում ղեկավարել ՌԴ-ն։
Ընտրությունների նախօրեին Պուտինը տեսաուղերձով դիմել է ՌԴ քաղաքացիներին, կոչ է արել մասնակցել ընտրություններին` արտահայտելով իրենց քաղաքացիական և հայրենասիրական դիրքորոշումը, քվեարկելով իրենց թեկնածուի և Ռուսաստանի հաջող ապագայի օգտին։
