Աշխարհի չեմպիոն Ֆրանսիայի հավաքականը դուրս եկավ աշխարհի առաջնության քառորդ եզրափակիչ։ Դիդիե Դեշամի գլխավորած թիմը մրցեց լեհերի հետ եւ առավելության հասավ 3:1 հաշվով։
44-րդ րոպեին խաղի հաշիվը բացեց Իտալիայի չեմպիոն «Միլանի» 36-ամյա հարձակվող Օլիվիե Ժիրուն, որին գոլային փոխանցում կատարեց Ֆրանսիայի չեմպիոն ՊՍԺ-ի 23-ամյա հարձակվող Կիլիան Մբապեն (տեսանյութ)։ Ժիրուն 52 գոլով դարձավ Ֆրանսիայի թիմի բոլոր ժամանակների լավագույն ռմբարկուն՝ գերազանցելով թիմի նախկին խաղացող Թիերի Անրիի ռեկորդը (51 գոլ)։
74-րդ րոպեին կատալոնական «Բարսելոնայի» 25-ամյա հարձակվող Ուսման Դեմբելեի փոխանցումից հետո ֆրանսիացիների առավելությունը կրկնապատկեց Կիլիան Մբապեն (տեսանյութ)։ Ավելացված առաջին րոպեին Մբապեն նաեւ դուբլ ձեւակերպեց։ Նրան գոլային փոխանցում կատարեց Մյոնխենգլադբախի «Բորուսիայի» 25-ամյա հարձակվող Մարկուս Տյուրամը (տեսանյութ)։ Մբապեն 9-րդ գոլը խփեց աշխարհի առաջնություններում։
Ավելացված 9-րդ րոպեին Լեհաստանի թիմը ստացավ 11-մետրանոցի իրավունք եւ այն արդյունավետ իրացրեց կատալոնական «Բարսելոնայի» 34-ամյա հարձակվող Ռոբերտ Լեւանդովսկին։
Քառորդ եզրափակիչում Ֆրանսիայի հավաքականի մրցակիցը կլինի Անգլիայի եւ Սենեգալի թիմերի դիմակայության հաղթողը։
