Այսօր Հայաստանի ՊՆ նախարարի պաշտոնակատար Վաղարշակ Հարությունյանի հետ հանդիպմանը ՌԴ ՊՆ նախարար Սերգեյ Շոյգուն շնորհավորել է նրան Հանրապետության տոնի առթիվ՝ նշելով, որ այս տոնական օրով նախարարի Մոսկվա այցը վկայում է այն մասին, որ Հայաստանի ու Ռուսաստանի միջև հարաբերությունները շարունակում են մնալ շատ բարձր մակարդակում, իսկ ռազմավարական համագործակցությունը շարունակում զարգանալ ու խորանալ:
Կողմերը քննարկել են ընթացիկ սուր խնդիրները: Ռուս պաշտոնյան, ինչպես հայտնում է ՌԻԱ Նովոստին, առաջարկել է քննարկել տարածաշրջանային անվտանգությանը վերաբերող հարցեր:
Նա նշել է, որ քննարկելու են հարցեր, որոնք վերաբերում են տարածաշրջանային անվտանգությանը, Արցախում ռուսական խաղաղապահ ուժերի գործունեությանը, բոլոր սուր հարցերին, որոնք ծագել են այս ընթացքում:
Հարությունյանն իր հերթին ասել է, որ քննարկելու են հարցեր, որոնք վերաբերում են համագործակցությանը, որն ընթանում է շատ հաջող:
Հանդիպման մեկնարկին Շոյգուն ասել է, որ Ռուսաստանն ու Հայաստանն ամրապնդում են ռազմական փոխգործակցությունն ինչպես երկկողմ ֆորմատով, այնպես էլ միջազգային կառույցների շրջանակներում, առաջին հերթին՝ ՀԱՊԿ-ում:
