Հայաստանում մարդիկ շարունակում են լուրեր տարածել, թե կորոնավիրուս չկա։ Կորոնավիրուսի հաստատման առաջին օրից ու դրանից առաջ էլ մենք որևէ տեղեկատվություն չենք պահել քաղաքացիների մասին: Դուք 100 տոկոսով իմացել եք այն, ինչ իմացել է կառավարությունը: Այս մասին ֆեյսբուքյան ուղիղ եթերի ժամանակ հայտարարեց ՀՀ վարչապետ Նիկոլ Փաշինյանը։
«Ես կոչ եմ անում, խնդրում եմ, պահանջում եմ խստորեն պահպանել պարետատան պահանջները՝ սկսած թաղումներից:
Մեր ամենամեծ պրոբլեմն այն է, որ համայնքներում, տեղ տեղ նաև Երևանում թաղումներն իրականացվում են այնպես, կարծես բան չի պատահել: Մենք դեպքեր ունենք, երբ թաղումները դառնում են համատարած բռնկումների պատճառ: Պետք է հետևել նաև, որպեսզի բանկերը, խանութները, դեղատները պահպանեն հերթի կանոնները: Փակ տարածքներում որևէ մեկն իրավունք չունի առանց դիմակի մտնելու: Մենք տուգանելու ենք, գանձելու ենք այդ տուգանքները: Սա ազգային անվտանգության հարց է»,-ասաց նա:
«Մենք հնարավորություն ունենք թույլ չտալու զարգացում, երբ հարյուրավոր մահեր կունենանք: Սա կախված է մեզնից յուրաքանչյուրի անհատական պահվածքից: Դա առաջին հերթին մեր ընտանիքների համար է:
Որևէ մեկը չի կարող երաշխավորել, թե ինչ հետևանքներ կլինեն, եթե կորոնավիրուսով վարակվի: Ես կոչ եմ անում տուրք չտալ սուտ լուրերին, թե կորոնավիրուս չկա, կամ վարչապետը դիմակի գործ է անում»,-նշեց նա: