«Ժամանակ». «Ռուսաստանի Դաշնության նախագահ Պուտինը, դեկտեմբերի 20-ին տեղի ունեցած մեծ մամուլի ասուլիսի ընթացքում, պատասխանելով Հայաստանի հետ հարաբերության մասին հարցին, ասել է, թե այդ հարաբերության մեջ ոչինչ էլ չի փլուզվել, որ պետք լինի վերականգնել: Նա ասել է, որ Հայաստանը Կովկասում և աշխարհում ՌԴ ռազմավարական գործընկերն է, հայ ժողովուրդը մերձավորագույն դաշնակիցն է, և այդ տեսանկյունից պետք է եղածը զարգացնել, խորացնել՝ հաշվի առնելով աշխարհում և տարածաշրջանում նոր իրողությունները:
Պուտինի այդ հայտարարությունը պետք է դիտարկել թերևս երկու կողմից կամ երկու ծայրից: Նախ այն, որ ՌԴ նախագահը, փաստորեն, հայտարարում է, որ հայ-ռուսական հարաբերության որևէ խնդիր էլ չկա: Մի բան, որի հակառակն են փորձում պնդել Հայաստանի նոր իշխանության ընդդիմախոսները, այսպես ասած՝ մտահոգ շրջանակները, որ հիմնականում ներկայացնում կամ սերում են նախկին իշխող համակարգի տարբեր շրջանակներից:
Այդ խնդիրների մասին բարձրաձայնումների մեծ առիթ էր նաև այն, որ Պուտինը խորհրդարանի ընտրությունից հետո առ այսօր շնորհավորական ուղերձ չի հղել Նիկոլ Փաշինյանին: Ռուսաստանի դեսպանը դա բացատրել է արարողակարգով, թեև, իհարկե, ոչինչ չէր արգելում Պուտինին շնորհավորել դրանից դուրս, ինչպես արել էր Սերժ Սարգսյանի դեպքում:
Մյուս կողմից՝ հայկական կողմի, նոր Հայաստանի համար թերևս պետք է խնդիրը լինի հենց այն, որ Պուտինը Նիկոլ Փաշինյանին և ընդհանրապես Հայաստանին չնայի այնպես, ինչպես Սերժ Սարգսյանին, չվերաբերվի այնպես, ինչպես վերաբերվել է Սարգսյանին և այսպես ասած՝ հին Հայաստանին:
Ահա այս տեսանկյունից էլ ՌԴ նախագահի հայտարարությունը, թե խնդիր չկա և պետք է զարգացնել եղածը, ըստ էության, կարող է վկայել, որ խնդիր, այդուհանդերձ, կա, և ՌԴ-ն չի ցանկանում փոխել եղածը, իսկ Երևանը դնում է հենց հակառակ խնդիր, որ չի կարող շարունակվել՝ ինչպես նախկինում:
Հավանաբար, հենց դա էր արտացոլված ՌԴ նախագահի այն հայտարարության տողատակում, թե պետք է զարգացնել եղածը և խորացնել՝ հաշվի առնելով նոր իրողություններ, և ինքն այդ հարցերը կքննարկի պարոն Փաշինյանի հետ, որն առաջիկա շաբաթ կայցելի Ռուսաստան:
Մյուս կողմից, խոսելով նոր իրողությունները հաշվի առնելու անհրաժեշտության մասին, ՌԴ նախագահն, ըստ երևույթին, փորձում է ակնարկել, որ Մոսկվան ամենևին կանգնած չէ, այսպես ասած, կոշտ դիրքերի վրա և պատրաստ է հաշվի առնել նոր իրողությունները, այլ կերպ ասած՝ նաև Հայաստանի նոր իշխանության փաստարկները:
Ամբողջ հարցը, ըստ երևույթին, այն է, թե որտեղ են Երևանի և Մոսկվայի փոխզիջման սահմաններն այդ հարցում: Մյուս կողմից՝ անկասկած է մի բան, որ հարաբերության վերափոխումն այլընտրանք չունի, և դա ընդունում է նաև ՌԴ նախագահը, խոսելով նոր իրողությունների մասին: Հարցն այն է, թե որ կողմն ինչ պատկերացում ունի այդ վերափոխման մասին: Միաժամանակ, նաև հասկանալի է, որ պատկերացումներն ամենևին չեն կարող նույնը լինել, և դրանք մերձեցնելու ու ներդաշնակելու գործընթացը պահանջելու է տևական աշխատանք:
Այդ իմաստով, գուցե հաջորդ շաբաթ Փաշինյանի՝ Ռուսաստան այցը հնարավոր է դիտարկել այդ աշխատանքի պայմանական մեկնակետ, որից կսկսի թերևս վերափոխումների կամ փոխզիջումների սահմանի հարցի քննարկումը»,-գրում է թերթը:
Նյութն ամբողջությամբ կարդացեք թերթի այսօրվա համարում:
