Երևան քաղաքի Ընդհանուր իրավասության դատարանի Շենգավիթի նստավայրում ՊՊԾ գունդը գրավելու համար մեղադրվող Արամ Մանուկյանի խափանման միջոցը փոխելու հարցի քննարկումն ավարտվեց. Արամ Մանուկյանն ազատ արձակվեց դատարանի դահլիճից:
«Ճահճացած վիճակից վերացանք, մնում է շենացնենք: Իմ ազատ արձակումը պայմանավորում եմ քաղաքական իրավիճակի ու հանրության գիտակցության մեջ փոփոխություններ հետ: Պայքարն ավարտված չէ, սպասենք տղերքը դուրս գան ու Հայաստանի և Արցախի հայությամբ նվիրվենք երկիրը շենացնելու ու կորցրած տարածքները հետ բերելու գործին: Չեմ փոշմանել իմ կատարած քայլերի համար, քանի որ կար գաղափար ու նպատակ»,- լրագրողների հետ զրույցում նշեց Արամ Մանուկյանը:
Հիշեցնենք, որ Արամ Մանուկյանին ներկայացված մեղադրանքի է առաջադրվել ՀՀ ՔՕ-ի 235-րդ հոդվածի 3-րդ մասի, 219-րդ հոդվածի 3-րդ մասի 1-ին կետի, 218-րդ հոդվածի 3-րդ մասի 1-ին կետի, 238-րդ հոդվածի 4-րդ մասի 1-ին և 2-րդ կետերի, 185-րդ հոդվածի 3-րդ մասի 1-ին կետի հատկանիշներով, ըստ որի նա 2016 թվականի հուլիսի 17-ին կազմակերպված խմբի կազմում ապօրինի կերպով ձեռք է բերել, պահել, փոխադրել և կրել հրազեն ու ռազմամթերք, խմբի կազմում զավթել և պահել է շենքեր, շինություններ և տրանսպորտի միջոցներ՝ զուգորդված դրանք ոչնչացնելու, վնասելու սպառնալիքով, ինչպես նաև նույն եղանակներով պատանդ է վերցրել և պահել երկուսից ավելի անձանց: Բացի դրանից, հրկիզման եղանակով դիտավորությամբ ոչնչացրել է տրանսպորտային միջոցներ՝ սեփականատերերին պատճառելով առանձնապես խոշոր չափերի վնաս:
