Բաքվին ականապատ դաշտերի 8 նոր քարտեզներ փոխանցելու հայտարարությունից 10 օր անց Ազգային անվտանգության ծառայությունը (ԱԱԾ) չի հստակեցնում՝ արդյոք դրանք ուղարկել են ադրբեջանական կողմին: «Ազատության» հարցին ի պատասխան իրավապահ կառույցից առաջարկեցին գրավոր հարցում ուղարկել, որին ավելի ուշ կպատասխանեն:
Երեկ Ադրբեջանի գլխավոր դատախազությունը հայտնեց, թե Թերթերի շրջանում ականի պայթյունից քաղաքացի է տուժել: Այս տեղեկությանը հետևեց պաշտոնական Բաքվի հերթական դժգոհությունը «հայկական կողմի տեղադրած ականներից»:
«Միջազգային գործընկերների ձախողումը՝ ստիպել Երևանին վերացնել այդ սպառնալիքը, ավելի շատ զոհերի և վիրավորների պատճառ է դառնում», – հայտարարեցին Ադրբեջանի արտաքին գործերի նախարարությունից:
Պաշտոնական Երևանն այս մեղադրանքներին դեռ չի արձագանքել:
