Կառավարության այսօրվա նիստում վարչապետ Կարեն Կարապետյանն անդրադարձավ համաշխարհային տնտեսական համաժողովի մասնակցության արդյունքներին:
«Դավոսում համաժողովի շրջանակներում տեղի են ունեցել մի շարք հանդիպումներ, մասնավորապես օտարերկրյա պետությունների բարձրաստիճան պաշտոնյաների, միջազգային ֆինանսական կառույցների և խոշոր ընկերությունների ղեկավարների հետ: Հանդիպումների արդյունքում ձեռք են բերվել պայմանավորվածություններ, և նախանշվել են համագործակցության ուղղություններ»,-ասաց նա:
Վարչապետը կառավարության աշխատակազմի ղեկավարին, Ռազմավարական նախաձեռնությունների կենտրոնին և Հայաստանի զարգացման հիմնադրամի գործադիր տնօրեններին հանձնարարեց 7 օրվա ընթացքում այցի արդյունքների մասին հաշվետվություն կազմել ու ընդհանուր տեղեկատվությունը փոխանցել շահագրգիռ մարմիններին:
Այնուհետև ԱԳ, տնտեսական զարգացման և ներդրումների նախարարներին, էներգետիկ ենթակառուցվածքների և բնական պաշարների, գյուղատնտեսության, տեղեկատվական տեխնոլոգիաների նախարարներին, Ռազմավարական նախաձեռնությունների կենտրոնին և Հայաստանի զարգացման հիմնադրամի գործադիր տնօրեններին հանձնարարեց ձեռնարկել միջոցներ այցի ընթացքում ձեռք բերված պայմանավորվածությունների կոնկրետ ժամկետներում կատարման, մշակման ու ներկայացման նպատակով ու պարբերաբար տեղեկատվություն ներկայացնել կառավարության աշխատակազմ:
