Հայաստանն ամեն ինչ անում է` Ադրբեջանի հետ ռազմական բալանսը պահպանելու համար: Այդ մասին կառավարության նիստից հետո լրագրողների հետ զրույցում հայտարարեց ՀՀ արտաքին գործերի նախարարի տեղակալ Շավարշ Քոչարյանը՝ անդրադառնալով Ադրբեջանի նախագահ Իլհամ Ալիևի հայտարարությանը, ըստ որի՝ Ադրբեջանը պատրաստվում է նոր սպառազինություն ձեռք բերել Ռուսաստանից և այդ առումով որևէ սահմանափակում չկա:«Հայաստանն ամեն ինչ անում է, որ որպեսզի պահպանի ռազմական բալանսը՝ ներառյալ նաև օգտվելով մեր դաշնակցի՝ Ռուսաստանի հնարավորություններից: Ընդ որում, համապատասխան սպառազինությունը մենք ստանում ենք անհամեմատ ավելի մատչելի գներով»,- «Արմենպրես»-ի փոխանցմամբ, ասաց Քոչարյանը:
Միաժամանակ, ՀՀ ԱԳ փոխնախարարն ընդգծեց, որ հայկական կողմը խնդիր չունի պատասխանելու Ալիևի վերը նշված հայտարարությանը, այլ խնդիր ունի պահպանելու ռազմական բալանսը, և այդ ուղղությամբ քայլեր կատարվում են:
