Հարավկորեական ԶԼՄ-ները հայտարարում են, որ Հյուսիսային Կորեայի «կորած» առաջնորդ Կիմ Չեն Ընը գտնվում է Ճապոնական ծովի Արևելա-Կորեական ծովածոցի ափին գտնվող մասնավոր ծովափնյա առանձնատանը։ Այս մասին ապրիլի 24-ին հաղորդել է Channel A հեռուստաալիքը։
ԶԼՄ-ների տվյալներով, անցյալ շաբաթ ԿԺԴՀ առաջնորդը լքել է Փհենյանը, որտեղ կորոնավիրուսով վարակվելու հավանականությունը մեծ է։ Պատճառներից մեկն էլ նշվում է այն, որ իբր կորոնավիրուս է հայտնաբերվել երկրի ղեկավարին մոտ կանգնած մարդկանց շրջանում։
Վոնսան-Կալմա առողջարանային շրջան Կիմ Չեն Ընը մեկնել է սեփական գնացքով։ Գտնվելով ինքնամեկուսացման մեջ՝ Կիմ Չեն Ընը կանոնավոր կերպով հետազոտվելու է բժշկական հաստատությունում, որը կառուցված է հենց նրա առանձնատան տարածքում։