«Խոսրովի անտառ» պետական արգելոցում տեղի ունեցած հրդեհից հետո կաղնուտների մասով գրեթե կորուստ չկա, իսկ գիհու ծառատեսակների մասով կորուստները դժվար վերականգնելի են:
ՀՀ բնապահպանության նախարար Արծվիկ Մինասյանի տեղեկացմամբ՝ մոտ 2200 հա վառված տարածքի մեջ կաղնու անտառածածկ տարածքը կազմում է 900 հա, որն ավելի հեշտ վերականգնվող է, քան գիհին. «Գիհի ծառատեսակների մասով կորուստներն անվերականգնելի են, կամ դժվար վերականգնելի: 220 հա գիհու անտառ է այրվել: Այրված խոտածածկ տարածքները կազմել են շուրջ 1100 հա, սրանք կվերականգնվեն աշնանային ու գարնանային անձրևների ժամանակ»,-նշեց նախարարը՝ տեղեկացնելով, որ վայրի և խոշոր կենդանիների մասով ևս կորուստ չեն արձանագրել: Անկում նկատվել է միայն մորեխների և սողունների մոտ:
