Search
Close this search box.

Երևանի կենտրոնում կիրակի օրերին մեքենաներն անվճար կկայանվեն

Երևանի ավագանին ընդունեց մայրաքաղաքի վճարովի ավտոկայանատեղիներում կիրակի օրերին կայանելու համար արտոնություն կիրառելու նախագիծը։

Ավագանու «Հանրային ձայն» խմբակցության անդամ Վահան Ավագյանը ներկայացրեց նախագիծը՝ նշելով, որ առաջարկել են՝ եթե խնդիրը դրված է բեռնաթափել քաղաքի կենտրոնն ու նվազեցնել խցանումները, ապա կիրակի օրերին երթևեկության ծանրաբեռնվածության աստիճանն էապես քիչ է։

Երևանի քաղաքապետ Տիգրան Ավինյանն էլ արձագանքեց, որ այդ առաջարկը տրամաբանական է և, ընդհանուր առմամբ, համահունչ է իրենց առջև դրված նպատակների հետ․

«Կարող եմ ասել, որ մեր սպասածից նույնիսկ մի փոքր ավելի է այդ բեռնաթափումը տեղի ունեցել»,- նշել է քաղաքապետը՝ հավելելով, որ ապագայում ավել տեսանելի արդյունքներ կլինեն. «Գարնանը մի փոքր ավելի բացահայտ կլինի, թե ինչ կոնկրետ արդյունք է ունեցել հենց միայն այս նախագիծը»։

Նա շեշտել է, որ ի սկզբանե հայտարարել են՝ այդ որոշումը ոչ թե հավելյալ գումարներ հավաքագրելու, այլ՝ Կենտրոնը բեռնաթափելու համար էր արված։

Ըստ այդմ, Երևան քաղաքի «Ա» և «Բ» գոտիներում կահավորված վճարովի ավտոկայանատեղիներում ավտոտրանսպորտային միջոցները կիրակի օրերին կազատվեն վճարից։ Նախագիծն ընդունվեց 34 կողմ ձայնով։