Search
Close this search box.

Էջմիածնում «Նուռ» սուպերմարկետի սեփականատերն ընկերների հետ ծեծել է ոստիկանության կապիտանին

Երեկ՝ հունվարի 29-ին, Վաղարշապատի քննչական բաժնի քննիչը միջնորդություն է ներկայացրել Արմավիրի մարզի ընդհանուր իրավասության դատարան, որպեսզի դատարանը, որպես խափանման միջոց, երկամսյա կալանքի որոշում կայացնի Արմավիրի մարզի բնակիչներ 61-ամյա Խաչատուր Հովհաննիսյանի, 41-ամյա Կարապետ Մանուկյանի և 49-ամյա Կարեն Թևոսյանի նկատմամբ։

Shamshyan.com-ի փոխանցմամբ՝ նշված անձինք կասկածվում են այս տարվա հունվարի 16-ին Արմավիր քաղաքում ՆԳՆ Ոստիկանության Վաղարշապատի բաժնի նախկին աշխատակցին դաժան ծեծի ենթարկելու, մարմնական ծանր վնասվածք պատճառելու մեջ։ Հունվարի 16-ին ոստիկանության բաժնում տեղեկություններ են ստացվել, որ այդ օրը Էջմիածին քաղաքի Լերմոնտով փողոցի թիվ 19 հասցեում գործող «Նուռ» սուպերմարկետի պահեստում նշված անձինք դաժան ծեծի են ենթարկել Արմավիրի մարզի բնակիչ 49-ամյա Կարեն Միրզախանյանին։

Վերջինն աչքի հատվածում ստացել է ծանր վնասվածք և տեղափոխվել Մալայանի հիվանդանոց, որտեղ ծանր վիրահատության է ենթարկվել և աչքի մեկը հեռացրել են։ Նա ունի նաև այտոսկրերի կոտրվածքներ: Այս պահին Կ. Միրզախանյանը գտնվում է Միքայելյանի անվան վիրաբուժական ինստիտուտում և շարունակում է բուժումը։ Պարզվել է, որ դաժան ծեծի, ժողովրդի լեզվով ասած, «գլավարը» եղել է Խ. Հովհաննիսյանը, ով «Նուռ» սուպերմարկետի սեփականատերն է։