Search
Close this search box.

Տիգրան Ավինյանի լիազորությունների ստանձնման օրինականության վիճարկման հայցը դատարանում է. Սամվել Գեւորգյան

Տիգրան Ավինյանի լիազորությունների ստանձնման օրինականության վիճարկման հայցը դատարանում է: Այս մասին իր ֆեյսբուքյան էջում հայտնել է Երեւանի ավագանու «Մայր Հայաստան» դաշինքի անդամ Սամվել Գեւորգյանը:

«Ինչպես արդեն տեղեկացրել էի, «Մայր Հայաստանի» որոշմամբ դիմել եմ դատարան՝ Տիգրան Ավինյանի՝ Երևանի քաղաքապետի լիազորությունների ստանձնման օրինականությունը վիճարկելու հայցով: Եղել է երկու հայց: Մեկը 1-ին ատյանի դատարանը մերժել է, և մենք այդ մերժումը վիճարկել ենք Վերաքննիչ դատարանում: Մյուս հայցն ընդունված է և այդ վարչական գործով դատական նախնական նիստը նշանակված է այս տարվա մարտի 5-ին:

Հիշեցնեմ, որ Տիգրան Ավինյանը քաղաքապետի լիազորությունները ստանձնել է Ավագանու հատուկ նիստում, որն իրավազոր չի եղել, քանզի չի ապահովվել քվորում: Այդ նիստին պետք է ներկա լինեին Ավագանու առնվազն 33 անդամ, ինչը տեղի չի ունեցել:

Քաղաքապետ ընտրվելու հարցում ՔՊԿ-ն ստվերային գործարքի գնաց ու քվորումի ապահովման միջոցով ստացանք փոքրամասնության իշխանություն: Բայց միևնույն է լիազորությունների ստանձնումն օրենքի խախտմամբ է եղել: Երևի քաղաքապետի աթոռը վերցնելուց հետո հավանաբար ուրախացել ու մոռացել էին գործարքը փաթեթով կայացնել, որպեսզի հատուկ նիստին էլ քվորում լիներ, սակայն դա իրենց խնդիրն է»,- գրել է նա: