Հայաստանում ժողովրդագրական ներկայիս իրավիճակի վերաբերյալ ՀՀ վարչապետ Նիկոլ Փաշինյանի տպավորությունները դառն են։ Այս մասին Փաշինյանն ասաց ԱԺ–ում կառավարության հետ հարցուպատասխանի ժամանակ։
Նշենք, որ փետրվարի 28-ին Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել են ժողովրդագրական ռազմավարության մշակմանը վերաբերող հարցեր:
«Մենք ժողովրդագրական իրավիճակի խնդիր ունենք շատ երկար ժամանակ, բայց մի լավ նորություն կար։ Հետազոտության արդյունքներն ասում էին, որ ճիշտ քաղաքականություն վարելու դեպքում կարող էինք ժողովրդագրական դինամիկայի մեջ էական, շոշափելի և տեսանելի փոփոխություն մտցնել։ Ըստ էության, հիմնական մոտեցումն այն է, որ ժողովրդագրական վիճակի բարելավման համար կարևորագույն հանգամանքը որակյալ կյանքի ու միջավայրի ստեղծումն է»,– նշեց Փաշինյանը։
Նա ընդգծեց, որ երեկվա քննարկմանը հարց է հնչել, թե ինչպես կանդրադառնա ժողովրդագրության վրա խաղաղությունը կամ ինչպես է անդրադարձել պատերազմը։ Վարչապետը շեշտեց, որ ժողովրդագրական ռազմավարության մշակման ուղղությամբ աշխատանքները շարունակվում են, և կան ռազմավարական ընտրություններ, որոնք պետք է կատարվեն։ Ըստ Փաշինյանի, այս հարցում մի քանի խնդիր կա։
«Շատ դեպքերում մենք տեսնում ենք, որ ծնելիության վրա ազդեցություն ունենալու գործիքներով երբեմն երեխայի ծնունդը դարձնում ենք սոցիալական գումար ստանալու միջոց։ Ռազմավարությունը նրանում է, որ երեխայի ծնունդը դարձնենք ուրախության միջոց և հավատի արգասիք, որ նրանց լավ ապագա է սպասվում»,– նշեց վարչապետը։
Նա շեշտեց, որ ժողովրդագրական վիճակի հետ կապված կարևոր նշանակություն ունի «ակտիվ ծերության» հանգամանքը (aging): Վստահ է` պետք է օրենսդրական փոփոխություններով այնպես անել, որպեսզի կենսաթոշակային տարիքի անձինք ակտիվ վիճակում լինեն և կարողանան հնարավորինս պահպանել տնտեսական գործունեությունը։
