Կառավարության այսօրվա նիստում վարչապետ Նիկոլ Փաշինյանն անդրադարձավ Երևանում անցկացված ՀԱՊԿ վեհաժողովին։ «Արդյունքում, ցավոք, մեզ չի հաջողվել ընդհանուր հայտարարի գալ երկու շատ կարևոր փաստաթղթերի վերաբերյալ։ Բայց իմ կարծիքով տեղի է ունեցել շատ բաց, անկեղծ և դրական քննարկում։ Այդ երկու փաստաթղթերն ուղարկվել են լրամշակման, և ես հույս ունեմ, որ մենք կկարողանանք լրամշակել և գալ ընդհանուր հայտարարի։
Չնայած այս հանգամանքին, որ Հավաքական անվտանգության խորհրդի հռչակագիրը չընդունվեց, այսինքն՝ մենք չստորագրեցինք հռչակագիրը և սեպտեմբերի 13-ի էսկալացիայի վերաբերյալ ՀԱՊԿ արձագանքի որոշումը չընդունվեց՝ մեր չստորագրելու պատճառով, բայց ես ընդհանուր առմամբ դրական եմ համարում քննարկումը և Ռուսաստանի Դաշնության հետ երկկողմ ֆորմատով ունեցած բանակցությունները։ Հույս ունեմ որ այն պայմանավորվածությունները, որոնք արձանագրվել են, հնարավորինս արագ կիրականացնենք»,- ասաց Փաշինյանը։
