ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է այսպես կոչված «Զանգեզուրի միջանցքի» հեռանկարները։
Պատասխանելով թուրքական Anadolu գործակալության հարցին, թե ինչպես է ՌԴ ԱԳՆ-ն գնահատում «Զանգեզուրի միջանցքի կազմակերպման» ջանքերը, Զախարովան նշել է. «Դե, մենք օգտագործում ենք երթուղի տերմինը»։
Նրա խոսքով՝ տարածաշրջանում տրանսպորտային կապերի ապաշրջափակման խնդիրը քննարկվել է Սոչիում կայացած գագաթնաժողովում ։ «Պայմանավորվածություն է ձեռք բերվել, որ համապատասխան աշխատանքները կշարունակվեն եռակողմ աշխատանքային խմբի շրջանակներում՝ Հայաստանի, Ռուսաստանի Դաշնության եւ Ադրբեջանի փոխվարչապետների համատեղ նախագահությամբ։ Ըստ էության, ինչպես որ սահմանվել էր երեք երկրների ղեկավարների՝ 2021 թվականի հունվարի 11-ի հայտարարության մեջ»,- ասաց նա։
Հիշեցնենք, որ հոկտեմբերի 31-ին Սոչիում տեղի է ունեցել Ռուսաստանի Դաշնության, Հայաստանի եւ Ադրբեջանի ղեկավարների հանդիպումը, որից հետո ընդունվել է համատեղ հայտարարություն։
