Մոսկվայի հայկական ճակատն ավելի արագ «փլվեց», քան ուկրաինականը․ Հնդկաստանի հարվածը Ռուսաստանին

Ուկրաինայում ռուսական զորքերը փորձում են ամրապնդել դիրքերն ուկրաինական բանակի սրընթաց հակահարձակումից հետո, որի արդյունքում ազատագրեց գրեթե ողջ Խարկովի մարզը և հասավ Ռուսաստանի սահմաններին։ Փորձագետները խոսում են ռուսական ճակատի «փլուզման» մասին, թեև խոստովանում են, որ Ռուսաստանը դեռ ռեզերվներ ունի Ուկրաինային զգալի վնաս հասցնելու համար։ Բայց ռուսական ճակատը քանդվում է ոչ միայն Խարկովի մոտ։

Մինչ եվրասիական առաջնորդները փորձում էին Սամարղանդում որոշել, թե ով է «վերևում», արյունալի բախումներ սկսվեցին Ղրղզստանի և Տաջիկստանի միջև, իսկ Հայաստանում՝ Ջերմուկի և Սոթքի մոտ, փշրվեց Ռուսաստանի փրկչի կերպարն ու ՀԱՊԿ-ի նկատմամբ վերջին հույսերը:

Երեւանում, չնայած Ռուսաստանի տոտալ ներկայությանը, հայտարարեցին, որ Ջերմուկի մոտ հրադադարը ձեռք է բերվել ԱՄՆ աջակցությամբ։ Հայաստանի խնդրանքով և Ֆրանսիայի նախաձեռնությամբ ՄԱԿ-ի Անվտանգության խորհրդում տեղի ունեցան քննարկումներ, որոնց ընթացքում Ռուսաստանը ցույց տվեց իր թշնամական վերաբերմունքը Հայաստանի նկատմամբ, իսկ մյուս երկրներն Ադրբեջանին ագրեսոր անվանեցին և պահանջեցին զորքերը հետ քաշել ելման դիրքեր։

ԱՄՆ Կոնգրեսի Ներկայացուցիչների պալատի նախագահ Նենսի Փելոսին հաստատել է, որ շաբաթ օրը կայցելի Երևան։ Իրանի նախագահը կրկին զգուշացրել է Պուտինին ու Էրդողանին աշխարհաքաղաքական սահմանների փոփոխման անթույլատրելիության մասին։ Հայաստանը ցույց տվեց, որ այլեւս չի գնալու միակողմանի զիջումների ճանապարհով, ասել է խորհրդարանի նախագահ Ալեն Սիմոնյանը՝ նշելով, որ Հայաստանը մտադիր չէ ապահովել այսպես կոչված «Զանգեզուրի միջանցքը»։

Ռուսաստանի և Թուրքիայի ծրագրերը Հայաստանում այս անգամ ձախողվեցին։ ՇՀԿ-ում աջակցություն ստանալու Պուտինի ծրագրերը նույնպես փլուզվեցին։ Հնդկաստանի վարչապետ Նարենդրա Մոդին անակնկալ հարված հասցրեց Պուտինին. «Այսօրվա դարաշրջանը պատերազմների դարաշրջան չէ», – ասել է Մոդին Պուտինին Սամարղանդում կայացած հանդիպման ժամանակ: Պուտինը ստիպված է եղել արդարանալ ու ասել, որ Մոսկվան անում է հնարավոր ամեն ինչ՝ հակամարտությունը դադարեցնելու համար։

Ռուսաստանը հույս ուներ Չինաստանի ռազմական օգնություն ստանալ Ուկրաինայի դեմ պատերազմում, ասել է Պետդեպարտամենտի խոսնակ Նեդ Փրայսը։ «Մենք ՉԺՀ-ին, ինչպես հրապարակայնորեն, այնպես էլ ամենաբարձր մակարդակով հասկացրել ենք, որ ուշադրությամբ հետևելու ենք Ռուսաստանին ռազմական օգնություն տրամադրելու կամ ընդունված պատժամիջոցները շրջանցելու համար Ռուսաստանին համակարգված օգնություն տրամադրելու ջանքերին, ինչը էական հետեւանքների կհանգեցնի»,- ասել է Պետդեպարտամենտի պաշտոնյան։ «Եվ մենք ՉԺՀ-ի կողմից որևէ փոփոխություն չենք տեսել», – ասել է նա: Պեկինը, չդատապարտելով Ռուսաստանին Ուկրաինայի դեմ պատերազմի համար, հրաժարվում է զենքի մատակարարումից Մոսկվա և շահում է նավթի և գազի զեղչերից:

Lragir.am