Search
Close this search box.

Կոչ ենք անում Ադրբեջանին անհապաղ դադարեցնել հարձակումը, հետ բերել զորքերը ելման դիրքեր. Եվրախորհրդարանի պատգամավորներ

Եվրոպական խոհրդարանի առաջատար պատգամավորները Հայաստանի ուղղությամբ ադրբեջանական հարձակման առնչությամբ հանդես են եկել համատեղ հայտարարությամբ՝ կոչ անելով Ադրբեջանին անհապաղ դադարեցնել հարձակումը, հարգել Հայաստանի տարածքային ամբողջականությունը:

Հայտարարությամբ են հանդես եկել Եվրախորհրդարանի արտաքին հարաբերությունների հանձնաժողովի նախագահ Դեյվիդ Մաքալիսթերը, ԵԽ Հայաստանի հարցով մշտական զեկուցող Անդրեյ Կովաչևը և ԵԽ Ադրբեջանի հարցերով մշտական զեկուցող Ժելյանա Զովկոն:

«Մենք ամենախիստ կերպով դատապարտում ենք լայնածավալ ռազմական բախումները, որ երեկ երեկոյան բռնկվեցին Հայաստանի և Ադրբեջանի սահմանի և Հայաստանի ինքնիշխան տարածքի որոշ հատվածներում։ Մենք ցավում ենք զոհերի մեծ թվի համար»,-շեշտել են պատգամավորները:

Նրանք կողմերին կոչ են արել լիարժեքորեն հարգել 2020 թվականի նոյեմբերի 9-ի եռակողմ հայտարարությունը:

«Հատկապես կոչ ենք անում Ադրբեջանին անհապաղ դադարեցնել իր հարձակումը, հետ բերել զորքերը իրենց ելման դիրքերը և լիովին հարգել Հայաստանի տարածքային ամբողջականությունը։ Քաղաքացիական բնակչության կառույցների և ենթակառուցվածքների վրա հարձակումների մասին հաղորդումները միանշանակ անընդունելի են։ Պետք է ամեն գնով խուսափել ցանկացած քայլից, որը կարող է հանգեցնել հետագա էսկալացիայի»,- շեշտել են ԵԽ պատգամավորները:

Նրանք ռազմական գործողությունների վերսկսումը հատկապես վտանգավոր են համարել այս պահին, քանի որ, իրենց գնահատմամբ, այն վտանգում է խաղաղության հավանական համաձայնագրի ուղղությամբ Հայաստանի և Ադրբեջանի ունեցած առաջընթացը: Պատգամավորները հիշեցրել են, որ երկու երկրների ղեկավարները երկու շաբաթ առաջ հանդիպել են Բրյուսելում և պայմանավորվել ակտիվացնել աշխատանքը՝ համաձայնագրի նախագծի ուղղությամբ:

Ըստ նրանց՝ կա պատմական շանս՝ Հայաստանի և Ադրբեջանի միջև ամուր և կայուն խաղաղության հասնելու համար, և այն չպետք է բաց թողնել: «Ուստի մենք խստորեն կոչ ենք անում Հայաստանին և Ադրբեջանին հնարավորինս արագ վերսկսել առարկայական բանակցությունները՝ ԵՄ-ի, մասնավորապես Եվրոպական խորհրդի նախագահ Շառլ Միշելի հովանու ներքո և միջնորդությամբ»,-նշել են նրանք:

Պատգամավորները վերջում ընդգծել են, որ Հայաստանի և Ադրբեջանի միջև կայուն և երկարատև խաղաղ կարգավորման հնարավոր չէ հասնել ռազմական ճանապարհով, անհրաժեշտ է միջազգային իրավունքին համապատասխան քաղաքական կարգավորում: