Վերջին ամիսներին թվում էր, թե 21-րդ դարի ահուսարսափ համավարակը՝ կորոնավիրուսը, որը բավականին ժամանակ ստիպել էր մարդկությանը փակվել տներում և ապրել սահմանափակ պայմաններում չքացել է, սակայն, ըստ առողջապահական կազմակերպությունների և հաստատությունների ամենօրյա հրապարակվող ցուցանիշների, այն կրկին գլուխ է բարձրացնում:
Ըստ առողջապահության համաշխարհային կազմակերպության տվյալների՝ հունիս ամսվա վերջին շաբաթվա ընթացքում կորոնավիրուսի նոր դեպքերի թիվն աճել է 18%-ով, ընդ որում՝ աշխարհում գրանցվել է ավելի քան 4,1 միլիոն դեպք։
Համաձայն այդ տվյալների՝ «Քովիդ-19»-ի նոր դեպքերի ամենամեծ շաբաթական աճը գրանցվել է Մերձավոր Արևելքում, որտեղ դրանք աճել են 47%-ով, Եվրոպայում և Հարավարևելյան Ասիայում՝ մոտ 32%-ով, իսկ Ամերիկայում՝ մոտ 14%-ով։
Մասնավորապես՝ Եվրոպայում «Քովիդ-19»-ի դեպքերի հանկարծակի աճը պայմանավորված է «Օմիկրոնի» BA.4 և BA.5 ենթատարբերակներով։ Այս տարբերակներն ավելի արագ են փոխանցվում և, նախնական կանխատեսումներով, մինչև հուլիսի վերջ եվրոպական երկրներում կդառնան գերիշխող։ Մեծ Բրիտանիայում, օրինակ, «Քովիդ-19»-ի դեպքերն աճել են 20 տոկոսով. նախորդ շաբաթ 2,7 միլիոն դեպք է գրանցվել, իսկ սա նշանակում է, որ 25 մարդուց 1-ը վարակակիր է եղել։
Մասնագետների կարծիքով՝ «Քովիդ-19»-ը վիրուսի ակտիվացման պատճառը սահմանափակումների թուլացումն է և ամառային արձակուրդներին ճամփորդությունների աճը։ Հատկանշական է, որ այս սեզոնին ակտիվ է նաև զբոսաշրջիկների մուտքը Հայաստան, և մեր երկրում ևս նկատվում է վիրուսի դեպքերի աճ:
Ըստ ՀՀ առողջապահության նախարարության տվյալների՝ վերջին մեկ շաբաթվա ընթացքում կորոնավիրուսով հաստատված դեպքերը մեզ մոտ կազմում են 354-ը, իսկ առողջացածների թիվը 226-ն է։ Վիրուսի հետևանքով մահեր, բարեբախտաբար, վերջին մի քանի ամիսների ընթացքում մեր հանրապետությունում չեն արձանագրվում։
ՀՀ առողջապահության նախարարության հիվանդությունների վերահսկման և կանխարգելման համաճարակաբանության բաժնի համաճարակաբան Ներսես Գրիգորյանը «Հայկական ժամանակի» հետ զրույցում նկատում է՝ ՀՀ-ում այս պահին թեև վիրուսով հաստատված դեպքերի աճ կա, բայց համաճարակային իրավիճակը համարվում է վերահսկելի։
Նրա խոսքով՝ ամառային ամիսներին զբոսաշրջության ակտիվությամբ պայմանավորված, երբ հատկապես այն երկրներից, որտեղ վիրուսի աճը այս ընթացքում ակտիվ է, ՀՀ են ժամանում տարբեր զբոսաշրջիկներ, այդ դեպքում ևս քովիդի ակտիվության միտում կլինի մեր երկրում։
«Այստեղ կարևորվում է քովիդի դեմ պատվաստումը, իսկ այն քաղաքացիները, որոնք արդեն պատվաստված են, ավելի պաշտպանված լինելու համար կարող են ստանալ բուստեր՝ լրացուցիչ պատվաստում։ Երկրներից շատերը սահմանափակումների հիմնական մասը հանել են՝ կարանտինը, թեստավորումը և այլն։ ՀՀ-ն էլ այլ երկրից ժամանածներից չի պահանջում թեստ կամ պատվաստում»,- նշում է մասնագետը։
Այս ամենի ֆոնին համաճարակային սահմանափակումների անցնելու և այլ երկրների հետ ճանապարհներ փակելու հարցերը քննարկելը, ՀՎԿԱԿ-ի մասնագետի խոսքով, կախված է համաճարակային իրավիճակից։ Այսինքն՝ եթե այն բարդացավ ոչ միայն Հայաստանում, այլ եվրոպական մի շարք երկրներում ևս, այդ դեպքում նոր կորոշվի քովիդի դեմ որոշակի սահմանափակումներ կիրառելը։
Համաճարակաբանը նկատում է՝ Հայաստանը Եվրամիության համաճարակային աղյուսակում զբաղեցնում է կանաչ գոտին, իսկ դա նշանակում է, որ հիվանդությունը մեր երկրում բավականաչափ նվազել է։
«Հայաստանում կորոնավիրուսի դեմ ամբողջապես պատվաստվել է 1 միլիոն 15 հազար 679 մարդ: Պատվաստումները օգնում են կանխարգելել վիրուսի ծանր ընթացքը և խուսափել մահվան ելքերից։ Այս ակտիվացման ֆոնին պատվաստվելը հատկապես կարևոր է»,- պնդում է համաճարակաբանը։
Ըստ Գրիգորյանի՝ Հայաստանում այժմ ակտիվ է հատկապես քովիդի «Օմիկրոն» շտամը։ Նրա խոսքով՝ մեր հարևան երկրներում, հատկապես՝ Վրաստանում և Թուրքիայում, նույնպես քովիդի ակտիվացում է նկատվում, այս առումով այդ երկրներից դեպի Հայաստան վիրուսի ակտիվություն կա։
ՀՎԿԱԿ-ի համաճարակաբանը նաև ընդգծում է՝ հիվանդության ակտիվության պարագայում Հայաստանը պատրաստ է դիմակայել քովիդի աճին՝ կարևորելով բնակչության առողջությունը։
