«Փաստ» օրաթերթը գրում է
Վերջին շրջանում մի քանի խոշորամասշտաբ մարզական միջոցառումներ ընթացան, խոսքը, մասնավորաբար, բռնցքամարտի և ծանրամարտի Եվրոպայի առաջնությունների մասին է: Հայ մարզիկները, մեղմ ասած, անմասն չմնացին մեդալներից, ընդ որում՝ ծանրամարտի առաջնությունում մեր ընտրանին թիմային հաշվարկով երկրորդն էր: Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանը գտնում է, որ մեր մարզիկների ելույթները կարելի է համարել գերազանց:
«Սովորաբար սպորտում արդյունքները գնահատում են 2 կատեգորիայով՝ բավարար և ոչ բավարար: Սակայն հաշվի առնելով վերջին տարիներին համաշխարհային հանրությանը նետված մարտահրավերները և հատկապես մեր պետության համար խիստ դժվարին ժամանակահատվածը՝ մեր մարզիկների արդյունքները կարելի է գնահատել գերազանց»,- «Փաստի» հետ զրույցում ասաց Ռոստոմյանը՝ ուշադրություն հրավիրելով այն փաստի վրա, որ ցանկացած մրցաշարից՝ լինի դա աշխարհի, թե Եվրոպայի առաջնություն, որ մարզաձևում էլ լինի՝ ծանրամարտի, բռնցքամարտի, ըմբշամարտի, հրաձգության, մարմնամարզության, մեր հավաքականները երբևէ չեն վերադառնում ձեռնունայն: Հայաստանի ազգային օլիմպիական կոմիտեի գլխավոր քարտուղարը սա համարում է կատարված աշխատանքի արդյունք:
Հ. Ռոստոմյանը մեր երկրի համար մի շատ կարևոր ձեռքբերման մասին էլ է նշում: «Մարզասերները թերևս նկատել են, թե որքան սահուն գործող չեմպիոնների անունների կողքին հայտնվում են նոր անուններ, նոր չեմպիոններ: Սա ևս համակարգված աշխատանքի արդյունք է»,- ասաց ՀԱՕԿ գլխավոր քարտուղարն ու, առիթն օգտագործելով, մեկ անգամ ևս շնորհավորելով վերջին մրցաշարերում հաղթանակներ գրանցած մեր բոլոր մարզիկներին, և իհարկե, մարզիչներին: Հայաստանի համար կարևոր իրադարձություն էր, որ բռնցքամարտի Եվրոպայի առաջնությունն ընդունեց մեր երկիրը: Իսկ մյուս տարի Հայաստանում է անցկացվելու նաև ծանրամարտի Եվրոպայի առաջնությունը: Նման միջոցառումների կազմակերպման պարագայում պակաս կարևոր գործոն չէ ՀԱՕԿ-ի ու պետական կառույցների, ի մասնավորի՝ ԿԳՄՍՆ-ի համագործակցությունը: Արդյո՞ք Հայաստանում արդյունավետ է այդ համագործակցությունը: «ՀԱՕԿ-պետություն համագործակցությունը մշտապես, բոլոր տարիներին գտնվել է ամենաբարձր մակարդակի վրա: Այսօր էլ, իհարկե, այդպես է, ՀԱՕԿ-ը իր աշխատանքային ուղեծրից երբևէ չի շեղվում: Ասվածի լավագույն ապացույցը մեր մարզիկների նորանոր փառահեղ հաղթանակներն են», – ասում է Հրաչյա Ռոստոմյանը:
Մեր զրուցակիցը շեշտում է, թե այն արդյունքները, որ այսօր ունենք և մեծ հպարտություն ենք զգում յուրաքանչյուր մարզիկի համար, տարիների աշխատանքի արդյունք է: «Քրտնաջան, սրտացավ, պրոֆեսիոնալ աշխատանք և՛ մարզիկների, և՛, որ պակաս կարևոր չէ, համապատասխան մարզական կառույցների կողմից: Այլ կերպ ասած՝ «հաջողության մենեջմենթ»՝ մարզադահլիճների շինարարություն, կառուցում և վերանորոգում, մարզիչների հետ կանոնակարգված աշխատանք, մարզումների ճիշտ գրաֆիկ և կազմակերպում և, իհարկե, պարգևատրման համակարգ: Այո՛, տաղանդավոր մարզիկներին և մարզիչներին հարկավոր է խրախուսել: ՀԱՕԿ-ի կառավարումը վերցնելուց հետո առ այսօր, երբ հետ եմ նայում, վստահորեն ասում եմ՝ հենց հաջողության մենեջմենթն է եղել ՀԱՕԿ-ի ձեռքբերումների հիմքում: Վստահորեն ասում եմ նաև, որ սերունդները դեռ կգնահատեն, թե ՀԱՕԿ նախագահ Գագիկ Ծառուկյանն ինչ է արել հայրենական սպորտի համար, թե որքան են նրա անձնական միջազգային կապերն ու հեղինակությունը ի շահս ծառայել հայկական սպորտին և դեռ կծառայեն»,- ասում է ՀԱՕԿ գլխավոր քարտուղարը:
Ֆեյսբուքյան տիրույթում շնորհավորելով տղաներին՝ Ռոստոմյանը հետաքրքիր մեկնաբանություն էր արել՝ պետության համար դժվարին այս ժամանակահատվածում կրկնակի արժևորելով տղաների հաղթանակը: Միևնույն ժամանակ չէր բացառել, որ հենց սպորտը կարող է լինել ազգային վերածննդի և ազգային համերաշխության երաշխիքը: Հարցնում ենք՝ ի՞նչ նկատի ունեիք ձեր այս մեկնաբանությամբ: «Մարզաշխարհը խիստ զգայուն է պետության, ժողովրդի, մեր իրականության հանդեպ: Եվ այո՛, սովորաբար, երբ պետությունն ապրում է դժվարին ժամանակահատված, պատմությունը ցույց է տվել, որ մարզական հաջողություններ այդ երկիրը գրեթե չի գրանցում: Դա էլ, երևի թե, ունի օբյեկտիվ բացատրություն՝ հոգեբանորեն ընկճված վիճակում դժվար է հաղթել: Բայց հայ մարզիկները ուղղակի կոտրեցին այս կարծրատիպը՝ միջազգային արենայում եռագույնը ամենաբարձրը ծածանելով:
Տղաները նույնիսկ վնասվածքով հարթակ դուրս եկան ու հաղթեցին՝ մեզ մեջքներս ուղղելու, ճակատներս բարձր պահելու շանս ընձեռելով: Այո՛, ես գտնում եմ և հատկապես վերջին հաջողությունների համատեքստում տեսնում եմ, որ մարզաշխարհն այս պահին ստանձնում է անչափ կարևոր առաքելություն՝ ժողովրդին, մեզ բոլորիս, ինչու չէ, դուխ տալու, ազգային համերաշխության և վերելքի կայծը դառնալու: Այս առաքելությունը պետք է դառնա յուրաքանչյուրինս, ըստ իս՝ ազգային վերածնունդը սկսվում է հենց այսպես»,-նշում է ՀԱՕԿ գլխավոր քարտուղար Հրաչյա Ռոստոմյանը:
Մանրամասները՝ «Փաստ» օրաթերթի այսօրվա համարում
