Search
Close this search box.

ՏԵՍԱՆՅՈՒԹ․ Պուտին. խաղաղապահ զորախումբը սահմանափակ ժամկետով կմնա Ղազախստանում

Խաղաղապահ զորախումբը սահմանափակ ժամկետով կմնա Ղազախստանում, իր գործառույթները կատարելուց հետո դուրս կբերվի հանրապետությունից։ Այս մասին ՀԱՊԿ Հավաքական անվտանգության խորհրդի արտահերթ նիստին ասել է ՌԴ նախագահ Վլադիմիր Պուտինը։

«ՀԱՊԿ հավաքական խաղաղապահ ուժերի զորախումբ է ուղարկվել Ղազախստան, եւ ես ուզում եմ դա ընդգծել՝ սահմանափակ ժամկետով՝ այնքան ժամանակ, որքան Ղազախստանի նախագահը, պետության ղեկավարը, Ղազախստանի ղեկավարը հնարավոր կհամարի դրա կիրառման համար»,- ասել է Պուտինը։ «Իր գործառույթները կատարելուց հետո, իհարկե, ամբողջ զորախումբը դուրս կբերվի Ղազախստանի տարածքից»,- հավելել է ՌԴ ղեկավարը։

Պուտինը Ղազախստանում ՀԱՊԿ խաղաղապահ օպերացիան չափազանց ժամանակին եւ օրինական է անվանել։ Ղազախստանի դեպքում ՀԱՊԿ-ը գործնականում ցույց է տվել իր ներուժը, արագ, վճռական եւ արդյունավետ գործելու կարողությունը, ասել է ՌԴ ղեկավարը։

Ինչպես նշել է նախագահը, Ռուսաստանը հասկանում է, որ Ղազախստանին սպառնացող վտանգն առաջացել է ոչ թե ինքնաբուխ բողոքի գործողությունների, այլ արտաքին եւ ներքին ապակառուցողական ուժերի պատճառով։ «Մենք հասկանում ենք, որ Ղազախստանի պետականությանը սպառնացող վտանգը ծագել է ոչ թե վառելիքի գների դեմ ինքնաբուխ բողոքի ցույցերի պատճառով, այլ՝ իրավիճակից ներքին եւ արտաքին ապակառուցողական ուժերի օգտվելու»,- ասել է Ռուսաստանի ղեկավարը:

Պուտինն առաջարկել է հանձնարարել ՀԱՊԿ երկրների անվտանգության խորհուրդների քարտուղարներին առաջարկներ ներկայացնել արտաքին միջամտության փորձերին համատեղ հակազդելու համար։ ՀԱՊԿ երկրները պետք է պատրաստ լինեն հակահարված տալ ցանկացած սադրանքների, որպեսզի ողբերգությունները, ինչպես Ղազախստանում, այսուհետ ոչ մեկին հանկարծակիի չբերեն, ասել է Պուտինը։ Նրա խոսքով՝ Ռուսաստանը մտադիր է շարունակել առաջնահերթ ուշադրություն դարձնել ՀԱՊԿ բոլոր երկրների հետ հարաբերությունների ամրապնդմանը։