Search
Close this search box.

Փաշինյանը մտադիր է ԱՊՀ ոչ պաշտոնական գագաթնաժողովի ընթացքում շփվել Ալիևի հետ. ՏԱՍՍ

ՌԴ նախագահ Վլադիմիր Պուտինն այսօր Սանկտ Պետերբուրգում մասնակցելու է ԱՊՀ անկախ պետությունների համագործակցության՝ ԱՊՀ երկրների ղեկավարների ավանդական ոչ պաշտոնական հանդիպմանը:

ՏԱՍՍ-ի հաղորդմամբ, ակնկալվում է, որ առաջնորդները կամփոփեն 2021 թվականին Համագործակցությունում Բելառուսի նախագահության արդյունքները, կարծիքներ կփոխանակեն ընդհանուր խնդիրների լուծման շուրջ և կքննարկեն համագործակցության արդյունավետության բարձրացման և կազմակերպության երկրների սոցիալ-տնտեսական զարգացման հետագա միջոցառումները։

Կրեմլի կայքի փոխանցմամբ, ոչ պաշտոնական հանդիպումը նախաձեռնել է ՌԴ նախագահը։ Գագաթնաժողովին կմասնակցեն Հայաստանի, Ադրբեջանի, Բելառուսի, Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի ղեկավարները։ Կմասնակցի նաև Ղազախստանի առաջին նախագահ Նուրսուլթան Նազարբաևը։

ՀՀ կառավարությունից հայտնել են, որ Նիկոլ Փաշինյանը դեկտեմբերի 28-ին աշխատանքային այցով կմեկնի Ռուսաստանի Դաշնություն՝ Սանկտ Պետերբուրգում մասնակցելու ԱՊՀ մասնակից պետությունների ղեկավարների ոչ պաշտոնական հանդիպմանը:

ՏԱՍՍ-ը գրում է, որ գագաթնաժողովի շրջանակում ընդհանուր հանդիպումից բացի, կարող են տեղի ունենալ նաև առանձին զրույցներ։

«Այսպես, Հայաստանի վարչապետ Նիկոլ Փաշինյանը մտադիր է այս միջոցառման ընթացքում շփվել Ադրբեջանի նախագահ Իլհամ Ալիևի հետ»,- գրել է ռուսական լրատվամիջոցը, ապա մեջբերել Փաշինյանի՝ օրեր առաջ արած հայտարարությունը. «Առայժմ երկկողմ հանդիպման մասին խոսք չկա, բայց ոչ պաշտոնական հանդիպում, ամենայն հավանականությամբ, տեղի կունենա»: