Քաղաքացիական պայմանագիր» կուսակցության վարչության անդամ, ՀՀ վարչապետի պաշտոնակատար Նիկոլ Փաշինյանը հանդիպում է ունեցել կուսակցության Ապարանի գրասենյակում, որտեղ ի թիվս այլ հարցերի անդրադարձել է հայ-ադրբեջանական սահմանին իրադրության և գերիների վերադարձի հարցերին։
«Արմենպրես»-ի հաղորդմամբ՝ Փաշինյանը նշել է. «Մենք ունենք պատշաճ միջազգային արձագանք մեր սահմանային իրադրության և գերիների հետ հարցի հետ կապված։ Այսօր միջազգային հանրությունը, ըստ էության, հստակ արձանագրել է գերիների վերադարձի անհրաժեշտությունը, և դա միջազգային ամենալայն արձագանք է ստացել»,- ընդգծել է նա։
Փաշինյանը համարում է, որ գերիների վերադարձի հարցը ժամանակի հարց է։ «Գերիների հարցն էլ են օգտագործում Հայաստանի ներքաղաքական սրացումներ ապահովելու համար։ Դա օգտագործում են մեր ներսում բախումներ հրահրելու համար։ Եվ փառք Աստծո, որ մենք դա հասկանում ենք, ինչքան էլ դժվար է, պիտի թույլ չտանք, որ Ադրբեջանն այդ գործոնը մեր ներքաղաքական իրադրության հարցերում օգտագործի»,- հավելել է ՀՀ վարչապետի պաշտոնակատարը։
