«Էրեխեք ջան, ինչը մեկնաբանեմ՝ դրան: Հեռախոսս փչացած է եղել, տեխնիկական խնդիր է եղել, 3G-ն չի անջատվել, դրանից է եղել»- այսպես մեկնաբանեց Աժ ՀՀԿ խմբակցության պատգամավոր Հերմինե Նաղդալյանն՝ իր ծառայողական բջջային հեռախոսից գոյացած 2 մլն դրամի պարտքի պատմությունը:
Նաղդալյանի փաստաբանի պարտականություններն անմիջապես իր վրա վրա վերցրեց ԱԺ լրատվության և հասարակայնության հետ կապերի վարչության պետ Արսեն Բաբայանը՝ նշելով, որ դեռևս մայիսին Հ.Նաղդալյանի բջջային հեռախոսի համար եղել է խոշոր գումար և այն ԱԺ աշխատակազմի կողմից վիճարկվել է: Իսկ «ՎիվաՍել-ՄՏՍ» ընկերությունն էլ, ըստ Արսեն Բաբայանի, կատարած ուսումնասիրության արդյունքում պարզել է, որ պարտքն առաջացել է տեխնիկական խնդրի պատճառով, մասնավորապես, ռոումինգ ցանցում միացված է եղել 3G կապը:
Արսեն Բաբայանը նաև տեղեկացրել էր, որ Ընկերությունը հրաժարվել է իր ներկայացրած հաշվից դեռևս մայիսին: Ուստի՝ ԱԺ աշխատակազմը գումար չի վճարել, հետևաբար՝ չկար և անհրաժեշտություն փոխհատուցման պահանջ ներկայացնելու:
Թվում էր, թե այսքանով աղմկահարույց թեման փակվեց, սակայն «ՎիվաՍել-ՄՏՍ»-ը՝ իր տարածած հաղորդագրությամբ՝ ուղղակի սառը ջուր լցրեց Նաղդալյանի ու Բաբայանի խոսքերի վրա:
«Վերջին շրջանում ԶԼՄ-ներում արծարծվող հարցերի կապակցությամբ, Ընկերությունն իրականացրել է ներքին ուսումնասիրություն և կարող է ամբողջ պատասխանատվությամբ հավաստել, որ Ընկերությունը չի ունեցել դուրս գրվող հաշիվներում շեղում առաջացնող որևէ տեխնիկական խնդիր, մատուցված ծառայությունների դիմաց հաշիվները տրվել են հավուր պատշաճի, դրանք չեն վերանայվել ընկերության կողմից և վճարվել են բաժանորդի կողմից»,- մասնավորապես նշված է ընկերության տարածած հաղորդագրության մեջ:
Փաստորեն` սա այն դեպքն է, երբ վարչապետի խոսքով ասած՝ դեռ գործ ունենք պրիմիտիվ ստախոսության հետ՝ զուգորդված պետությանն ամեն գնով կեղեքելու, թալանելու ու եղած ապացույցները կոծկելու, պարտակելու փաստով:
ArmLife.am