Search
Close this search box.

Համաշխարհային բանկից ևս 2 մլն դոլարի վարկ՝ ոռոգման համակարգին

Համաշխարհային բանկը լրացուցիչ 2 մլն դոլար է տրամադրում Հայաստանի ոռոգման համակարգի զարգացման համար. «Ոռոգման համակարգերի բարելավման ծրագրի» լրացուցիչ ֆինանսավորման համար Հայաստանի եւ Համաշխարհային բանկի ստորագրած 2 միլիոն ԱՄՆ դոլարի վարկի շնորհիվ՝ ջրային ծառայության մատուցման բարելավումից ուղղակիորեն կշահեն Հայաստանի 630-ից ավելի ֆերմերներ:

ՀԲ երեւանյան գրասենյակից տեղեկացնում են, որ ֆինանսավորումը նպատակաուղղված է ծախսարդյունավետ եւ կայուն ոռոգման ապահովման իր ջանքերում կառավարությանը հետագա աջակցության ցուցաբերմանը՝ էներգիայի օգտագործման կրճատմամբ եւ ջրամատակարարման ժամանակի բարելավմամբ:

Լրացուցիչ ներդրումները կներառեն ներտնտեսային համակարգի կառուցումը՝ Բաղրամյան-Նորակերտի նախատեսված ինքնահոս համակարգի համալրման համար, քանի որ գործող ներտնտեսային համակարգն ի վիճակի չէ հուսալիորեն ոռոգման ջուրն ուղղակիորեն հասցնել գյուղացիների հողատարածքներ:

Ի սկզբանե, ֆինանսավորումը տրամադրվել էր միայն ինքնահոս կառույցի, ինչպես նաեւ մայր եւ միջտնտեսային ջրանցքների համար: Այսպիսով՝ ներտնտեսային համակարգի վերականգնումը կապահովի սկզբնական ներդրումների օգուտների լիարժեք իրացումը:

«Այս ներդրումը հիմնվում է ընթացիկ ծրագրով մինչ այժմ ձեռքբերված արդյունքների վրա: Բանկի միջամտությամբ կնվազի ջրի պակասի խնդիրը, որին բախվում են ֆերմերները, կբարձրանա ջրամատակարարման հուսալիությունը եւ ժամանակին ապահովումը՝ իր հերթին տալով արտադրողականությունը բարձրացնելու հնարավորություն»,- ասաց Համաշխարհային բանկի Հայաստանի գրասենյակի տնօրեն Սիլվի Բոսութղոն՝ հավելելով. «Բացի այդ, վերակառուցված ներտնտեսային համակարգը կնախագծվի՝ ֆերմերներին ընձեռելով ներտնտեսային տեխնոլոգիաների նոր, օրինակ՝ կաթիլային ոռոգման ընտրություն»:

Բաղրամյան-Նորակերտ ինքնահոս համակարգն ընդգրկում է մոտավորապես 5 կմ երկարությամբ սնուցող ջրանցքի շինարարություն, որը ջուրն ստանալու է Տկահան ջրանցքից (սկզբնաղբյուրը Սեւանա լիճն է), եւ որը վերակառուցված ինքնահոս համակարգով ջուրը կհասցնի շուրջ 573 հա գյուղատնտեսական հողատարածքների՝ 635 ֆերմերների օգնելով իրենց խաղողի եւ պտղատու այգիների մշակման հարցում: Ջրանցքի շինարարությունից հետո երեք պոմպակայանները (Նորակերտ 1-2 եւ Բաղրամյան 1), որոնք սպառել են իրենց ծառայության ժամկետը, այլեւս անհրաժեշտ չեն լինի:

Ծրագրի մյուս ձեռքբերումը Մեղրիի ինքնահոս համակարգի երեք լոտերի շինարարության ավարտն է: Գեղարդալճի ինքնահոս համակարգի շինարարությունը, ինչպես նաեւ Քաղցրաշենի ինքնահոս համակարգի երկու լոտերի աշխատանքներն իրականացման ընթացքում են: Ընդ որում այդ երկուսն էլ փոփոխվեցին՝ Գողթ եւ Գառնի համայնքների բնակիչների մտահոգությունները փարատելու համար: Ակնկալվող վերջնարդյունքներից է տարեկան շուրջ 36.4 միլիոն կիլովատ ժամ (կՎժ) էլեկտրաէներգայի տնտեսումը, որը համարժեք է Հայաստանի ոռոգման ընդհանուր կարիքների շուրջ 30 տոկոսին: Ավարտվել է նաեւ ընտրված հեռացնող ջրանցքների վերականգնումը՝ ջրի կորուստը տարեկան շուրջ 23 միլիոն խորանարդ մետրով կրճատելու միջոցով՝ հանգեցնելով ջրթող ջրանցքների ջրի տեղափոխման արդյունավետության բարձրացման:

«Ոռոգման համակարգերի բարելավման ծրագրի» լրացուցիչ ֆինանսավորումը՝ 2 միլիոն ԱՄՆ դոլար գումարով, փոփոխական սփրեդով ՎԶՄԲ (Վերակառուցման զարգացման միջազգային բանկ) վարկ է, որն ունի 14.5 տարվա արտոնյալ եւ 25 տարվա մարման ժամկետ:

1992 թ. Համաշխարհային բանկին եւ 1993 թ. ՄԶԸ-ին (Միջազգային զարգացման ընկերակցություն) անդամակցելուց ի վեր՝ Հայաստանի նկատմամբ ՄԶԸ եւ ՎԶՄԲ ընդհանուր հանձնառություններն կազմել են 2.3 միլիարդ ԱՄՆ դոլար: