Պետական եկամուտների կոմիտեի նախագահ Վարդան Հարությունյանն խորհրդարանում վրդովվեց հարցից, թե արդյոք շահերի բախում չկա նրանում, որ իր որդիների հետ փոխկապակցված ընկերությանը հարկային արտոնություններ են տրվում.«Բոլորին արտոնություն տրվում է: Բոլոր նրանք, ովքեր էդ մասով ներդրումներ են անում, այսինքն՝ գյուղատնտեսության ոլորտում, ստանում են: Մեքենա-սարքավորումների ներմուծումը հունվարի 1-ից ազատվում է, և այդ արտոնությունը տրվել է այն կոնտեքստում, որ ամսի մեկից նորից այդ գանձած գումարների հետ վերադարձի խնդիր չառաջանա»,- նշեց նա՝ հավելելով, որ չկա ընկերություն, որը դիմած լինի և այդ արտոնությունից ստացած չլինի:
Թե իսկ ինչպե՞ս է ստացվում, որ հարկային արտոնություններ ստացող ընկերությունների 30 տոկոսը փոխկապակցված են պաշտոնյաների հետ, ՊԵԿ նախագահը պատասխանեց՝ իսկ ո՞վ ասաց, որ պաշտոնյաների ազգականներն իրավունք չունեն արտոնությունից օգտվելու, սահամանափակում կա՞:«Ես բարձրաձայն հնչեցնում եմ, որ բոլորին է թույլատրվում, բոլոր էն տնտեսվարողները, ովքեր դիմում են, ստանում են էդ արտոնությունը, ավելին, հունվարի 1-ից դա բոլորի համար է գործելու», հայտարարեց նա:
Կառավարությունը մի կողմից հայտարարում է, որ պայքարում է շահերի բախման դեմ, օրենքներ է ընդունում այդ ուղղությամբ, բայց մյուս կողմից նմանօրինակ արտոնություններ են տրվում պաշտոնյաների հետ փոխկապակցված անձանց, դա նորմա՞լ է, հարցին ի պատասխան Վարդան Հարությունյանը նշեց. «Իմ որդիները ջերմոց կամ այգի են կառուցում, պտի չկառուցե՞ն: Էս երկրում ապրելու իրավունք չունե՞ն»: Երբ լրագրողները նկատեցին, որ արտոնյալները ջերմոց են կառուցում, իսկ հասարակ գյուղացին այդ հնարավորությունը չունի, ՊԵԿ նախագահն ասաց, որ թող գյուղացիներն էլ նույնն անեն, ոչ մի արգելք չկա: Դիտարկմանը, որ այդ դեպքում գյուղացու համար այդ բիզնեսը շահավետ չէ, նա վրդովվեց. «Ո՞վ ասաց, իմ որդիները ապրանքը արտահանում են: Լավ, եղավ, հասկացանք, ներդրում էլ չենք անի էս երկրում, ամեն ինչ հասկանալի ա»: